Këshilltari politik i presidentit të Kosovës, Artan Behrami ka reaguar ndaj kryeministrit në detyrë Albin Kurtit i cili ka kërkuar opinion nga Komisioni i Venedikut për kompetencat e Presidentit lidhur me dekretimin e Avdullah Hotit si mandatar për formimin e Qeverisë.
Behrami përmes një postimi në Facebook, thotë se kryeministri Kurti i ka ditët e numëruara, dhe është ngutur pasi këtë ka pas mundësi ta dërgojë edhe në Gjykatën Speciale.
Sipas tij, Komisionit i Venedikut nuk merret me çështjet që kanë të bëjnë me procedurat e zgjedhjes së Qeverisë.
Ai ka kërkuar nga Kurti që të gjenë ndonjë këshilltar më të mirë ligjor, pasi këtë që e ka nuk i dallon vendimet për Masën e Përkohshme me vendimin final të Gjykatës Kushtetuese.
Postimi i plotë:
Kryeministri me ditët e numëruara, Albin Kurti, dje e paska dërguar një kërkesë në adresë të Komisionit të Venedikut për të kërkuar opinion mbi kompetencat e Presidentit lidhur me dekretimin e Avdullah Hotit si mandatar për formimin e Qeverisë së re.
Qenka ngutur dhe e paska harruar edhe një institucion të Kosovës. Ka mundur ta dërgojë edhe në Gjykatën Speciale!
Komisioni i Venedikut nuk merret me çështje që kanë të bëjnë me procedurat e zgjedhjes së Qeverisë.
Edhe në ditën kur Gjykata Kushtetuese merr në shqyrtim lëndën, Kurti paragjykon vendimin e saj dhe nisë përgatitjen e terrenit për mospranimin e tij përmes një organi ndërkombëtar, që nuk ka kurrfarë autoriteti mbi Gjykatën Kushtetuese.
Gjeje ndonjë këshilltar më të mirë ligjor Albin, jo si ky profesori i drejtësisë që po e mban si ministër, i cili nuk e dallonte as vendimin për Masën e Përkohshme me vendimin final të Gjykatës Kushtetuese!