Liderët shtetërorë e qytetarë të shumtë kanë bërë homazhe të mërkurën në Prekaz, te Kompleksi Memorial “Adem Jashari”, me rastin e 26-vjetorit të Epopesë së UÇK-së.
E këto nderime, për Faton Klinaku, ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK) po bëhen vetëm për përfitime elektorale.
Ai për Front Online ka thënë se qeveria aktuale nuk po bën asgjë për kategoritë e luftës.
“Dëshmorët nuk janë nderuar as në të kaluarën e sidomos tash nuk janë duke u nderuar fare. Janë duke i nderuar vetëm për përfitimet e tyre elektorale. Dëshmorët nuk duhet të përkujtohen vetëm në data të caktuara, por dëshmorët dhe familjet e tyre duhet të përkujdesen institucionet për ta. Institucionet e Kosovës duhet të përkujdesen për kategoritë e luftës, qofshin ata familjet e dëshmorëve, invalidë e veteranë, e qeveria aktuale nuk është duke bërë asgjë në këtë drejtim”, ka thënë ai për Front Online.
Klinaku: Dëshmorët të respektohen jo vetëm në përvjetorë
Faton Klinaku, ushtruesi i detyrës së kryetarit të Organizatës së Veteranëve të Luftës së Ushtrisë Çlirimtare të Kosovës (OVL-UÇK) thotë se Qeveritë duhet ta kujtojnë se kanë ardhur në pushtet si rezultat i luftës çlirimtare.
Ai për Front Online thotë se familjet e dëshmorëve dhe kategoritë e tjera të luftës, duhet të respektohen jo vetëm nëpër përvjetorë.
“Mesazhi i im për Qeverinë është që duhet ta kujtojë se qeveria aktuale dhe ato të kaluarat duhet ta kenë parasysh që kanë ardh në pushtet si rezultat i luftës tonë çlirimtare dhe kategorive që ne i përfaqësojmë, qofshin veteranë, invalidë dhe familjet e dëshmorëve, prandaj duhet të kemi kujdes të i respektojmë dhe t’i nderojmë këto vlera, dhe jo vetëm nëpër aktivitete ose përvjetorë kur i kanë ata, por duhet bashkëpunim edhe me organizatat që i përfaqësojnë këto vlera”, u shpreh ai.
