Njësia Speciale Intervenuese (FIT) ka paralajmëruar protestën e radhës. Në protestë do t’i bashkangjitet edhe njësiti special i Policisë së Kosovës, FAST Kosova. Kështu bëjnë të ditur burimet e Paparacit.
Protesta do të mbahet nesër (e martë) duke filluar nga ora 12:00. Paralajmërimi tashmë u është dorëzuar stacionit policor Qendra në Prishtinë.
FAST është njësia më kredibile dhe arreston personat me rrezikshmëri të lartë. Ky njësit përbëhet nga një numër i të rinjve të cilët sipas njohësve janë trajnuar edhe jashtë vendit.
Kjo protestë mbahet për të shprehur pakënaqësitë lidhur me pagën, rrezikshmërinë dhe shtesat tjera.
Kujtojmë që kjo është protesta e dytë. Më 1 nëntor u mbajt protesta e parë para Qeverisë së Kosovës.
Në mbështetje të tyre doli opozita, kurse pozita deklaroi se të njëjtit kanë të ardhura mujore mesatare mbi 2 mijë e 200 eurove gjatë këtij viti, kështu duke shkaktuar reagime të shumta.
