Kryetarja e Kuvendit, Vjosa Osmani ka reaguar ndaj deklaratave të sotme të presidentit të Kosovës, Hashim Thaçi i cili në “Rubikon”tha se dikush nga familja e Osmanit ka shërbyer për Serbinë.
Osmani ka shkruar se babai i saj e ka njohur komandant suprem, Ibrahim Rugovën dhe sipas saj, për këtë edhe po akuzohet për tradhti.
Ajo ka shkruar gjithashtu se LDK-ja do të ketë njollë se e ka votuar për president të Kosovës, Hashim Thaçi.
Ky është reagimi i plotë i Osmanit:
Sonte, gjarpri paska provuar të kafshojë nderin e familjes sime.
Babai im e ka njohur për Komandant suprem Dr.Ibrahim Rugovën. Me gjasë, prandaj, Thaçi po e shpallë familjen time tradhtare, njëjtë siç e shpallte Rugovën me komunikatat e tij të 90-tës e tutje. T’i shërbesh vendit tënd duke e njohur Rugovën si prijës, sipas Thaçit qenka sikur t’i shërbesh Serbisë. Shpallja e kundërshtarëve politik si bashkëpunëtorë të Serbisë i ka paraprirë gjithnjë sulmeve fizike e eliminimeve. E njëjta logjikë, si duket, po synohet të instalohet tash për të arsyetuar sulme të paramenduara e parapërgatitura.
Në historinë e Lidhjes Demokratike të Kosovës, nuk do të ketë njollë më të zezë se sa zgjedhja e këtij njeriu për President të vendit. Lidhja Demokratike e Kosovës do të jetë sërish lidhje me popullin vetëm në ditën kur kërkon falje të sinqertë e përkulet para qytetarëve për këtë gabim i cili po e qon vendin tonë drejt humnerës. Por ky vend nuk i është nënshtruar as regjimeve gjenocidale. Nuk do të dorëzohet as para shpifësve në rolin e Presidentit. E deri ateherë, kur ky popull do ja tregojë vendin secilit, me votë, ky njeri mbetet faqja më e zezë e vendit tonë.
