Deputeti i Kuvendit të Kosovës, Abelard Tahiri, e ka ftuar Prokurorinë e shtetit ta hetojë Lëvizjen Vetëvendosje për shkak të disa përgjimeve ku pretendohet se Mimoza Kusari – Lila ka komunikuar me Milan Radojçiq, i cili është në Listën e Zezë të ShBA-së.
Përgjimeve të cilave iu referua Tahiri, u publikuan nga mediumi Nacionale. Në këto përgjime pjesëmarrës janë Mimoza Kusari – Lila me anëtarin e Listës Serbe, Slavko Simiq, ku diskutojnë për disa komunikime që Kusari – Lila, sipas tij, i ka pasur me Radojçiqin.
“Realisht këtu po del diçka tjetër që ne seancë të jashtëzakonshme duhet me pas për komunikimet e VV-së me Radojciqit. Sapo i dëgjuam disa përgjime që dokumentojnë bashkëpunimin me kryekriminelin me Radojciq. I bëj thirrje Prokurorisë së shtetit që të marrë hapa në raport me gjithë ata njerëz që janë në komunikim me njerëz të cilët janë në ndjekje nga Prokuroria e në listën e zezë të ShBA-së”, ka thënë ai.
“Sot me gjastë po fillon një epokë e re e prezantimit të bashkëpunimit të VV-së me Radojciq. Në grupin tuaj ka figura kredibile për me fol për një cështje të tillë. U hap një epokë e re e cila po e prezanton një angazhim tuajin me kryekriminelin Radojciq. I falënderoj mediat që po bëjnë më shumë se ne për demaskimin e Albin Kurtit”, ka vijuar ai.
Reagime nga PDK ka pasur edhe nga kryetari i kësaj partie, ai ka ironizuar me kryeministrin e Kosovës, Albin Kurti, duke e pyetur se “Albin, me Milan Radojçiqin, a me koordinim a pa koordinim?”.
Ngjashëm ka reaguar edhe nënkryetarja e kësaj partie, Vlora Çitaku, e cila ka thënë “Nejse, koordinim paska…ama me Milanin”.
Sipas mediumit Nacionale, këto incizme janë bërë në qershor të vitit të kaluar. Biseda ndërmjet Kusari-Lilës e Slavko Simiqit është bërë në zyrën e shefes së grupit parlamentar të Vetëvendosjes.
Në hyrje të bisedës, Slavko Simiq ia përmend Kusari-Lilës një bisedë që kjo e fundit e ka bërë me Milan Radojiçiqin. Njeriu në listën e zezë të Amerikës, i dyshuar për vrasjen e Oliver Ivanoviqit dhe i dyshuar për rastin Brezovica.
Në bisedë, Simiç i thotë Kusari-Lilës, “ti e di që unë të kam lidhur me Millanin, keni biseduar rreth 30-40 minuta për gjetjen e ndonjë zgjidhje”, Kusari-Lila i thotë se “dy tre minuta”.
Pas kësaj, Simiç thotë se “një herë kemi biseduar më gjatë, ku kemi folur për energjinë në veri, a e mban mend. Kemi provuar të gjejmë zgjidhje dhe të ndërtojmë raport partnerësh dhe disa vendime që i marrim bashkë me të, nuk mundet të ndikojë as Vuçiq”.
