Ish drejtori i Përgjithshëm i Policisë së Kosovës, Rashit Qalaj, ka dhënë dëshminë e tij në lidhje me procesin gjyqësor të ish krerëve të OVL-së së UÇK-së, Hysni Gucati e Nasim Haradinaj.
Qalaj tha se në lidhje me rrjedhjen e dokumenteve nga ZPS-ja është informuar nga drejtori i Departamentit të Hetimeve në Policinë e Kosovë, pasi sipas tij, vet ai ka qenë jashtë shtetit.
Më tej, deputeti i PDK-së tha se hetuesit e PK-së, pasi kanë dëgjuar që në zyrat e OVL-së janë sjellur dosje që mund të jenë të rasteve të Gjykatës Speciale, të njëjtit kanë kontaktuar me zyrtarë të OVL-së së UÇK-së dhe janë takuar me ta.
“Në takim, hetuesit janë informuar se personi-at e panjohur kanë sjellur në zyrat e kësaj shoqate dokumente që dyshohet se mund të jenë të Gjykatës Speciale në Hagë”.
“Për këtë arsye, zyrtarë të OVL-së kanë kërkuar nga hetuesit e PK-së që të hetojnë këtë rast dhe të identifikojnë personin që po sillte dosje ne zyrat e shoqatës”, thuhet në dëshminë e Qalajt, njofton Klankosova.tv.
Më tej, ai tha se pas kërkesës nga zyrtarët e OVL-së, Policia e Kosovës ka komunikuar me Prokurorinë Speciale në Prishtinë, nëse duhet të procedohet tutje dhe a duhet të hapet rast në lidhje me këtë.
Qalaj tha se Prokuroria Speciale në Prishtinë i ka thënë Policisë së Kosovës se ky rast është kompetencë e Prokurorisë Speciale në Hagë dhe se autoritetet kosovare nuk mund ta hetojnë këtë rast, pa pasur kërkesë nga Prokuroria Speciale në Hagë.
“Policisë së Kosovës nuk i është kërkuar nga askush që të merret me hetimin e këtij rasti, ndërsa sa i përket Prokurorisë Speciale nuk e di, ndërsa ne, PK-ja, kemi marrë udhëzime nga Prokuroria Speciale që të mos merremi me trajtimin e këtij rasti”, ka thënë Qalaj në dëshminë e tij.
Tutje, ai tha se pas këtij, Policia e Kosovës nuk ka vazhduar të grumbullojë informata apo ta identifikojë personin që po sillte dosje në zyrat e OVL-së së UÇK-së.
“Kontrollimi i kamerave rreth zonës nuk mund të bëhet pa urdhëresë nga gjykata. Nuk janë ndërmarrë veprime hetuese, pasi që nuk kemi pasur autorizim nga Prokuroria”.
“Më sa di, askush nga PK-ja nuk ka qenë i pranishëm në zyrat e OVL-së apo në zyrën e ZPS-ë në Prishtinë”.
“Arsyeja se pse PK-ja nuk i ka marrë këto dokumente është pasi që Prokuroria Speciale e Kosovës nuk ka autorizuar që të fillojmë hetim”.
“Policia e Kosovës s’ka qenë brenda gjatë bastisjes por ka bërë sigurimin e jashtëm të ndërtesës pasi bastisja është bërë nga njësitet speciale të EULEX-it dhe hetuesit e ZPS-së”.
Në fund, Qalaj tha se pas dërgimit të tretë të dokumenteve, Policia e Kosovës ka pasur kërkesë nga shoqatat e dalura nga lufta për sigurimin e zyrave të tyre, por sipas Qalajt, Policia e Kosovës siguron vetëm objektet shtetërore të rëndësisë së veçantë.
