Mbajtja e orëve mësimore në distancë do të ndikojë në përkeqësimin e cilësisë së arsimit, tha eksperti i çështjeve të arsimi, Dukagjin Pupovci. Ndërsa, sa i përket spekulimeve se ai do të jetë udhëheqës i Ministrisë së Arsimit dhe Shkencës në Qeverinë “Kurti 2”, Pupovci tha se nuk ka pasur ofertë për këtë pozitë.
Në Kosovë po shqyrtohen mundësitë për fillimin e mësimit online në të gjitha nivelet e arsimit, për dy javët e ardhshme. Drejtori ekzekutiv i Qendrës për Arsim të Kosovës, Pupovci tha se do të ketë humbje të mëdha për shkak të mungesë së kushteve.
“Sa herë që kalohet prej mësimit me praninë e mësimit online, duhet ta kemi parasysh që do të ketë humbje për shkak të kushteve në të cilat organizohet mësimi online në Kosovë, nëse situata epidemiologjike e kërkon një gjë të tillë, atëherë askush nuk mund të thotë asgjë, dhe sa kam kuptuar unë tani shkollat do të mbyllen për një javë dhe pastaj do të shihet mundësia e kompensimit, por mund të ndodh që gjatë periudhës në vijim për shkaqe të shpërthimit të epidemisë edhe të organizohet mësimi online dhe mendoj që situata të tillë do të ndikojnë në cilësinë e arsimimit në përgjithësi”, tha Pupovci.
Si mundësi që janë hedhur që Pupovci mund të jetë ndër emrat që është propozuar të mundshëm për ministër të arsimit, ai tha që nuk ka pasur një ofertë të tillë dhe nuk mund të bëjë spekulime apo sugjerime që mund të ketë një ofertë.
“Unë nuk kam ndonjë ofertë të kësaj natyre, nuk ka pasur biseda edhe unë kam dëgjuar raste të tilla por mendoj që kjo do të zgjidhet brenda strukturave të partisë ku unë nuk bëj pjesë, por nuk kisha pasur dëshirë të bëj spekulime dhe të sugjeroj se do të ketë ofertë të tillë, sepse një ofertë të tillë nuk ka pasur, me siguri që ajo është zgjidhur me kuadro brenda partisë”, përfundoi Pupovci.
