Lidhja Demokratike e Kosovës sot ka vendosur emrin e kandidatit të partisë për zgjedhjet e përgjithshme.
Lideri i LDK-së, Isa Mustafa ka bërë të ditur se kandidati i kësaj partie për kryeministër të Kosovës është Avdullah Hoti.
Në një konferencë për media, Mustafa tha se Hoti do të vazhdojë rrugën e tij si kryeministër edhe në kandidimin për kryeministër nga kjo parti.
Isa Mustafa në një konferencë për media tha se vlerësojnë se Qeveria Hoti nuk ka rënë si pasojë e mos-punës apo diçka e ngjashme dhe se e shohin të drejtë që Hoti të vazhdojë të jetë kandidati i tyre për kryeministër.
“Kemi vlerësuar se Qeveria ka punuar mjaftë mirë dhe ka qenë shumë e zellshme në luftën kundër pandemisë COVID-19, kemi shprehur gjithmonë dhimbjen tonë për viktimat dhe familjarët si pasojë e COVID-19. Kemi falënderuar jo vetëm partitë e koalicionit, por edhe partitë opozitare që e kanë përkrahur së fundi aprovimin e Ligjit për Rimëkëmbje Ekonomike, si formë që ne duhet ti ndihmojmë bizneset, qytetarët dhe të mund të nxjerrim vendin nga kjo situatë në të cilën jemi. Është argument se Qeveria e ka bërë punën mirë dhe kryeministri Hoti edhe vetë është angazhuar në punë dhe në luftimin e korrupsionit. Qeveria e cila ka aftësi dhe ka vullnet të kthejë të mirën në qeverisjen e këtij vendi. Konsiderojmë se Z.Hoti është kryeministër i kësaj qeverie dhe se do të vazhdojë ta bëjë këtë punë dhe vazhdon të jetë kandidat i ynë për zgjedhjet e ardhshme”, tha Mustafa.
Mustafa tha se sonte do t’i drejtohet Këshillit të Përgjithshëm, pasi aty përfundon i gjithë vendimi për kandidimin e Hotit.
