Barcelona e ka rigjetur rrugën e fitores në La Liga pasi e mundi 2:1 Villarrealin, por nuk mund të jetë plotësisht e qetë për shkak se superylli i skuadrës Lionel Messi u detyrua ta braktisë këtë takim për shkak të një dëmtimi muskulor.
Barcelona po vinte nga një humbje tronditëse 2:0 kundër Granadës në fundjavë dhe me trajnerin Ernesto Valverde nën presion, fitorja ishte e domosdoshme.
Dhe pikërisht këtë e arriti, pas Antonio Griezmann dhe Arthur shënuan për t’i siguruar tri pikë të rëndësishme katalonasve.
Rrëmbimi i tri pikëve të plota mund të jetë lajm i gëzueshëm për Valverden dhe katalonasit, por natyrisht situata e Messit i shqetëson ata.
Messi nuk qe në gjendje ta vazhdojë ndeshjen dhe u zëvendësua pas përfundimit të pjesës së parë. 32-vjeçari, i cili sonte ishte titullar për herë të parë këtë sezon për shkak të lëndimit në kofshe që e la jashtë për gati dy muaj, luajti 45 minuta gjatë të cilëve ka ndier shqetësime muskulore.
Ai u zëvendësua nga Ousmane Dembele pas pjesës së parë.
Barça e nisi furishëm takimin, me Messin që harkoi për Antoine Griezmann, i cili shënoi me kokë në minutën e 6-të.
Arthur e dyfishoi epërsinë pas një çereku lojë me një gol të jashtëzakonshëm. Mesfushori brazilian shënoi nga mbi 30 metra largësi një gol raketë që e la të shtangur portierin e Villarrealit.
https://streamable.com/qqeti
https://streamable.com/i9bdm
https://streamable.com/dcftv