Disa ditë pas arrestimit të krerëve të UCK-së, Komiteti për Punë të Jashtme i Kongresit në SHBA ka shkruar se Gjykata Speciale nuk po i heton edhe krimet serbe në Kosovë, edhe pse këtë e ka në juridiksion. Përderisa, Specialen e kanë cilësuar si gjykatë njëetnike.
E për këtë komunikatë të Komitetit për Punë të Jashtme në Amerikë, Bashkimi Evropian nuk ka pranuar të japë përgjigje të qartë në interesimin e RTK-së.
Në përgjigjen e zëdhënësit të BE-së për politikë të jashtme e siguri, Peter Stano, vlerësohet kontributi i Kosovës për themelimin e Dhomave të Specializuara.
“Dhomat e Specializuara do të mbajnë përgjegjës personat që kanë kryer krime individualisht, dhe nuk do të mbajnë përgjegjësi për asnjë grup etnik, organizatë ose komunitet”, tha Stano për RTK.
Për dallim nga Shtetet e Bashkuara të Amerikës, Bashkimi Evropian po pretendon se mandati dhe juridiksioni i Speciales është mirë i përcaktuar. Por, pa specifikuar nëse Specialja do të hetojë edhe krimet serbe të kryera në Kosovë.
“BE ka mirëpritur përpjekjet dhe vendimin e autoriteteve të Kosovës për t’i krijuar Dhomat e Specializuara dhe Zyrën e Prokurorit të Specializuar si institucione të pavarura gjyqësore, që veprojnë në përputhje me mandatin e tyre të përcaktuar mirë”, thuhet në përgjigje.
Por, mbi çfarë baze po thirret Komiteti për Politikë të Jashtme në Amerikë, kur po kërkon hetimin e krimeve serbe?
Kjo është e përcaktuar qartë edhe në Ligjin për Dhomat e Specializuara, ku thuhet se Specialja ka juridiksion edhe mbi krimet e kryera ndaj shtetasve të Kosovës.
“Dhomat e specializuara kanë juridiksion mbi personat e nënshtetësisë Kosovare/IRJ apo mbi personat që kanë kryer krime në kuadër të juridiksionit të tyre lëndor kundër personave me nënshtetësi kosovare/IRJ kudo që janë kryer ato krime”, thuhet në Ligj.
Përderisa Specialja ende nuk ka hetuar asnjë krim serb, liderët e Ushtrisë Çlirimtare të Kosovës kanë mbajtur seancat e para, ku janë deklaruar të pafajshëm për të gjitha akuzat.
Një seancë e radhës për ecurinë e çështjes në aktakuzën ndaj Hashim Thaçit, Kadri Veselit, Jakup Krasniqit e Rexhep Selimit, është caktuar më 18 nëntor.
