Përzgjedhësi i Kosovës, Bernard Challandes, ka dhënë komentet e tij pas ndeshjes me Malin e Zi.
Challandes tha se nuk ishte shumë i kënaqur, dhe pret që në ndeshjet e tjera të ketë konkretizime.
“Kishim mundësinë që të mbyllnim ndeshjen disa herë në pjesën e dytë, pasi patëm dy raste të mira. Nëse nuk shënojmë, normalisht se jemi në rrezik. Pranuam një gol dhe nuk jam i kënaqur. Kemi luajtur ndeshje të veçantë si mysafirë, skuadra mbajti topin mirë, patëm raste për shënim, por u ndëshkuam. Nuk ishte ndeshja më e mirë e mundshme” deklaroi Challandes.
“Duhet të jemi më të qetë në fazën e fundit, ndoshta duhet të kemi më shumë vetëbesim, pasi kjo është ajo për çka kanë nevojë sulmuesit. Ndonjëherë kjo nuk shpjegohet. Kemi ushtruar dhe kemi parë se kemi kualitete. Nuk mund ta shpjegoj këtë. Nuk kam zgjidhje të veçantë. Duhet të mbajmë vetëbesimin dhe të vazhdojmë” ka thënë tutje trajneri.
“Nuk ishte kërkesa ime që Muriqi të tërhiqej mbrapa, ishte ndjenja që kishte ai. Në minutat e fundit luajtëm për fitoren.”
“Ka mundur të jetë një zgjidhje tjetër, por kemi pasur Rashanin në të majtë, Zhegrovën në të djathtë dhe Rashicën e Muriqin në qendër. Nuk mund të luajmë vetëm me sulmues. Celina ishte i mirë, por kemi edhe ndeshjen tjetër” ishin fjalët e Challandes kur ai shpjegoi zëvendësimin Rashani – Celina.
