Një lajm që ka qarkulluar gjatë ditës së sotme nëpër media ku thuhej se “Nesër pritet që midis organizatave të dala nga lufta e UÇK-së dhe disa avokatëve nga Turqia, të nënshkruhet një memorandum bashkëpunimi për mbrojtjen e të ftuarve nga Gjykata Speciale. Detaje nga kjo marrëveshje do të bëhen publike gjatë ditës së nesërme”, del të jetë plotësisht i pa vërtetë.
Në një prononcim për “Bota Sot”, kryetari i Veteranëve të Kosovës (OVL-UÇK) Hysni Gucati ka hedhur poshtë pohimin se nesër pritet të nënshkruhet ndonjë marrëveshje me ndonjë grup avokatësh turq, ai ka thënë se nuk është në dijeni për ndonjë marrëveshje sa i përket OVL-UÇK, dhe gjithkush që flet në emër të kësaj organizate për ndonjë marrëveshje të tillë, është një e pavërtetë e madhe.
“Me përgjegjësinë më të madhe të kryetarit të Organizatës së Veteranëve të Luftës së Ushtrisë Çlirimtare të Kosovës, ju them se organizata jonë as nuk ka nënshkruar, e as nuk do të nënshkruaj kurrfarë marrëveshje me kurrfarë avokati turk. Mund të ketë ndonjë organizatë lokale, ndonjë matrapaz i cili dëshiron të bëjë ndonjë punë kokë më vete, por një gjë e tillë në mënyrë kategorike është e pa vërtetë”, ka thënë Gucati.
