Në orët e mesnatës në fshatin Zahaq të Pejës është vrarë veterani i luftës së Ushtrisë Çlirimtare të Kosovës, Qerim Kelmendi.
Lajmin e ka konfirmuar edhe Policia e Kosovës, Drejtoria Rajonale e Policisë në Pejë, të cilët kanë dhënë detaje rreth gjetjes së trupit të pajetë të Kelmendit.
“Me datën 27.02.2020 rreth orës 01:27, Policia e Kosovës Drejtoria Rajonale e Policisë në Pejë, është informuar se në fshatin Zahaq-Pejë, në një rrugë është duke u djegur një veturë. Me të marrë informatën njësitet e Stacionit Policor në Pejë kanë shkuar në vendngjarje, ku vërejtur një veturë e cila ishte përfshirë tërësisht nga zjarri. Në vendin e ngjarjes kanë arritur njësitet e zjarrfikësve të cilët e kanë shuar në tërësi zjarrin”, thuhet në komunikatë.
Tutje, policia tregon se gjatë kohës sa zjarrfikësit ishin duke e lokalizuar zjarrin, aty e kanë vërejtur edhe një person.
“Në brendësi të veturës është vërejtur një person (viktimë mashkull) trup i karbonizuar”, theksohet në njoftim.
“Vendit të ngjarjes i janë përgjigjur njësitet relevante të sektorit rajonal të hetimeve, njësiti K9, si dhe prokurori i shtetit dhe ekipi mjekësor, të cilët kanë konstatuar vdekjen e viktimës. Gjatë shikimit të vendit të ngjarjes është konstatuar se vetura e djegur është e tipit VW Passat me targa vendore”, thonë nga policia në Pejë.
Sipas kësaj komunikate, thuhet se Sektori Rajonal i Hetimeve pranë Drejtorisë Rajonale të Policisë në Pejë, në bashkëpunim të plotë me prokurorin e shtetit janë duke u marrë të gjitha veprimet hetimore për të sqaruar rrethanat e këtij rasti të cilësuar ‘vrasje’ dhe janë duke u bërë përpjekje maksimale për të identifikuar kryesin ose kryesit e mundshëm.
Qerim Kelmendi ishte pjesëtar i hershëm i UÇK-së dhe bashkëpunëtor i Zahir Pajazitit e Ilir Konushefcit. Ai poashtu është vëllai i Ibrahim Kelmendit, ish-anëtarit të Lëvizjes Popullore të Kosovës./Fokusi.info/
