Feronikeli do ta shkruajë historinë në futbollin kosovar nëse ia arrin qëllimit ta tejkalojë sfidën The New Saints, i njohur si TNS, dhe të kalojë në rundin e dytë kualifikues në përpjekje për ta siguruar pjesëmarrjen në Ligën e Kampionëve, duke u bërë klubi i parë kosovar që arrin kaq larg.
Kampioni i Kosovës e pret sonte në orën 20:45, kampionin e Uellsit TNS në stadiumin Fadil Vokrri, në ndeshjen e kthimit të rundit të parë kualifikues, duke ditur se ka një rezultat të favorshëm falë barazimit 2:2 më rikthim dramatik nga ndeshja e parë në Uells javën e kaluar, shkruan Gazeta Express.
Nikli po humbiste 2:0 nga TNS deri në minutën e fundit të ndeshjes pas golave nga Greg Draper dhe Aeron Edwards, por dy gola të vonshëm ama të shpejtë nga Mevlan Zeka dhe Astrit Fazliu e kompletuan rikthimin sensacional të klubit kosovar të martën në Park Hall.
Klubi nga Drenasi mund të kalojë në rundin e dytë kualifikues me çfarëdo fitore dhe madje edhe me barazim pa gola dhe 1:1. Barazimi 2:2 e çon ndeshjen në kohën shtesë dhe penallti potencialisht, ndërsa çfarëdo humbje apo çfarëdo barazimi 3:3 dhe më lart e eliminon Niklin.
Feronikeli nuk tregoi shpirt luftarak dhe mentalitet fitues vetëm në ndeshjen e parë ndaj TNS-së, por edhe kur e fitoi rundin preliminar. Sepse e mundi Santa Coloma në finale të këtij miniturneu me rikthim 2:1 edhe pse për pjesën më të madhe të pjesës së dytë luajti më një futbollist më pak.
Fitues i dyfishtë në Kosovë, i ligës dhe kupës, Nikli mund ta shkruajë historinë nëse e kalon këtë rund, duke u bërë klubi i parë kosovar që arrin kaq larg në kualifikime për Ligën e Kampionëve, garën më prestigjioze evropiane për klube.
Drita e Gjilanit shkroi historinë vitin e kaluar kur e arriti rundin e parë kualifikues por u eliminua pas humbjes nga Malmo.
Në rast kalimi në rundin e dytë kualifikues, Feronikeli do të përballet me klubin danez Kobenvahn.
Por as eliminimi nuk është fundi për kampionin e Kosovës, pasi humbësi i këtij dueli do të ketë mundësi ta vazhdojë ëndrrën për kualifikim në garat evropiane.
Humbësi do të takohet me fituesin e duelit mes Slovan Bratislava dhe Sutjeska në kualifikime për garën dytësore evropiane, Ligën e Evropës.
