Shpend Maxhuni ka dhënë dorëheqje nga pozita e drejtorit të AKI-së.
Këtë e bëri të ditur vetëm pak çaste më parë, kryeministri në detyrë i Kosovës, Ramush Haradinaj.
Përveç që e pranoi dorëheqjen e tij, Haradinaj edhe e dekoroi Shpend Maxhunin me medaljen e Skënderbeut për kontributin dhe besnikërinë e tij ndaj atdheut.
Mirëpo cilat janë arsyet e dorëheqjes së tij.
Lajmi.net ka kontaktuar me zëdhënësen e Qeverisë, Donjeta Gashi, e cila ka sqaruar se Maxhuni nuk ka dhënë ndonjë arsyetim për vendimin e tij.
Ajo thotë se Qeveria e ka marrë vetëm vendimin nga tanimë ish-kreu i AKI-së, dhe se detaje tjera nuk ka.
“Vetëm ajo që është publikuar, nuk është dhënë ndonjë arsyetim”, ka thënë Gashi.
Maxhuni në të kaluarën kishte qenë edhe drejtor i Policisë së Kosovës, para se të kyçej si kreu i intelegjencës kosovare.
