Ministrja e Drejtësisë, Albulena Haxhiu, për 16-vjetorin e Kushtetutës së vendit, ka theksuar misionin themelor të saj për mbrojtjen dhe shërbimin e interesave të popullit pa ndikime të jashtme.
Në një postim në rrjetin social, Facebook, Haxhiu ka thënë se fryma demokratike është thelbi i vlerës së Kushtetutës, i cili nuk mund të zëvendësohet.
“Republika e Kosovës sot shënon 16-vjetorin e Kushtetutës së saj. Si akti më i lartë normativ, Kushtetuta ka misionin themelor për të mbrojtur dhe shërbyer interesat e popullit në mënyrë të drejtë dhe pa ndikime të jashtme. Fryma e saj demokratike është thelbi i vlerës së saj, i cili nuk mund të zëvendësohet”, ka shkruar Haxhiu në Facebook.
Ministrja Haxhiu ka theksuar gjithashtu se duhet angazhim i plotë i të gjithëve në zbatimin e Kushtetutës me përgjegjësi, duke vlerësuar se çdo shkelje apo neglizhencë rrezikon besueshmërinë e saj.
“Ne urojmë dhe angazhohemi që zbatimi i Kushtetutës të respektojë këtë frymë të lirë, të plotë dhe të përgjegjshme përpara ligjit, duke përfshirë të gjithë ata që marrin vendime kushtetuese për Republikën e Kosovës dhe qytetarët e saj.Çdo shtrembërim, neglizhencë ose përdorim i gabuar i fuqisë së saj, ulë kredibiletin, për të cilën asnjëherë nuk duhet lejuar”, ka shkruar Haxhiu.
Haxhiu ka uruar që Kushtetuta të kultivohet në avancimin e frymës demokratike, duke siguruar mbrojtjen e interesave shtetërore dhe respektimin e interesave të qytetarëve.
