Izet Haxhia ka ndryshuar strategji në përballjen me drejtësinë dhe Sali Berishën për vrasjen e Azem Hajdarit. Avokati i tij, Idajet Beqiri la jashtë listës së dëshmitarëve ish-kreun e Shërbimit Informativ Kombëtar, Fatos Klosi. Edhe gazeta e raportoi se Idajet Beqiri e kishte parë jo të arsyeshme thirrjen e Klosit, por klienti i tij ka menduar ndryshe. Gazeta e paralajmëroi se Izet Haxhia do të vinte me një dëshmitar surprizë të premten.
Ajo është Majlinda Popoviç dhe Izet Haxhia ka kërkuar nga gjykata që të thirret si dëshmitare. Mirëpo përveç saj Haxhia ka kërkuar që të jetë prezent edhe Fatos Klosi, një ndër armiqtë më të mëdhenj të Sali Berishës. Pra Haxhia duket se ka ndryshuar tërësisht strategji ditë e fundit, ndërkohë vetë Klosi tha pak ditë më parë për gazetën se ai ishte gati të dëshmonte. Ditët e fundit Klosi ka hedhur akuza të forta ndaj Berishës duke e implikuar në ngjarje.
Dhe Haxhia pretendon të njëjtën gjë dhe si duket ish-truproja e Berishës ka kërkuar ndihmën e Klosit në këtë betejë të fuqishme. Sa i takon Majlinda Popoviç, bëhet fjalë për një emër të rëndësishëm. Berisha pretendon se ka qenë Haxhia ai i cili ka telefonuar Hajdarin dhe e ka nxjerr në pritë. Por sipas Haxhisë, dy janë elementët që mund të vërtetojnë të kundërtën: Tabulatet telefonike dhe Majlinda Popoviç. Sipas Haxhisë, Azem Hajdari ka pasur një numër celulari AMC në atë kohë, por që rezultonte i regjistruar në emrin e zonjës Popoviç. Sipas palës mbrojtëse ajo mund të hedhë dritë mbi ngjarjen.
Izet Haxhia para arrestimit ka folur për këtë çështje, duke i drejtuar disa pyetje Berishës. “Më datën 12 shtator sa herë me anë të këtij numri keni komunikuar me M.Popoviç, një femër me origjinë nga Vraka e Shkodrës, në emër të së cilës ishte numri i telefonit celular që përdorte Azem Hajdari? Pse pikërisht në emër të kësaj qytetareje me origjinë serbe e kishte marre nr. e telelefonit Azem Hajdari? Me çfarë posti u shpërblye kjo M. Popoviçi më vonë”, deklaronte Haxhia vite më parë.
Detajet e seancës
Gazeta kontaktoi dje me avokatin Idajet Beqiri, i cili ka dhënë detaje nga seanca e djeshme, duke qenë se për shkak të Covid aksesi i gazetarëve është i pamundur. Avokati ka rrëfyer se përse shihet me interes dëshmia e Popoviç. “Azem Hajdari para se të vritej dhe ditën e vrasjes mbante si telefon, numrin që kishte me kontratë kjo shtetase. Ai këtë gjë e bënte shpesh, sepse u shmangej përgjimeve telefonike, ndaj nuk kishte asnjë telefon të tij me kontratë.
Në këtë numër telefoni që figuron në emrin e Majlinda Popoviç, me banim në Shkodër, Azemin e kanë nxjerrë në pritë ku edhe e vranë. Kjo dëshmitare do të hedhë dritë për këtë fakt dhe më tej do të kërkojmë ku ndodhet ky telefon si dhe tabulatet e tij për bisedat e zhvilluara para dhe mbas vrasjes së Azem Hajdarit”, tha avokati. Ndërsa sa i takon thirrjes së Fatos Klosit, duket se deklaratat e tij të fundit i kanë ndërruar mendje Haxhisë. Klosi ka pasur përplasje të forta me Berishën ditët e fundit pasi akuzojnë njëri-tjetrin si të përfshirë në ngjarje. Sipas avokatit, dëshmia e Klosit është mjaft e vyer.
“Nga ana tjetër kërkuam të thërresim si dëshmitar Fatos Klosin, i cili di shumëçka rreth rolit të gjithsecilit në këtë proces, posaçërisht për rolin dhe pozitën e Izet Haxhisë në këtë vrasje. Në datën 2 nëntor ora 14:30 gjykata do të shprehet për të gjitha provat që kemi kërkuar, kë do të pranojë dhe kë do të rrëzojë”, tha avokati.
