Nënkryetari i PSD-së, Frashër Krasniqi, thotë se arrestimi i Dardan Molliqajt është përgatitur për një kohë të gjatë.
Krasniqi në RTV Dukagjini thotë se arrestimi i Molliqajt ishte proces për të frikësuar opozitën dhe izoluar zërat opozitar.
“Ka disa elemente që tregojnë se ky është një rast i orkestruar politik. E para e punës Policia e Kosovës ka pritur rreth katër ditë për të bërë arrestimin. Pra ka pritur që të ndërtohet propaganda që filloi menjëherë pas protestës kundër Molliqajt, pra derisa të krijoheshin kushtet që arrestimi i Molliqajt të mos shkaktonte pakënaqësi”, tha ai, përcjell Telegrafi.
“Molliqaj në ditën e protestës ka qenë në shesh pas përfundimit të protestës ku ka mundur të arrestohet. Kemi shkuar në zyre bashkë ku prapë ka mundur ta arrestoj policia. Ka shkua në banesën e tij ku policia prapë ka mundur ta arrestoj ose t’ia dërgojë ftesën. Ka qenë prapë në zyre ku ne publikisht kemi thirr konferencë për media dhe policia nuk është shfaqur fare. Tek kur është krijuar momentumi, pa pranuar fare ftesë për intervistim ka kulmuar me arrestim”, deklaroi Krasniqi.
Nënkryetari i PSD-së thotë se aktivisti tjetër Adem Megjuani është paraqitur vullnetarisht në polici dhe ata e kanë arrestuar.
Krasniqi thotë se janë disa rregulla për dorëzimin e ftesës për t’u paraqitur në polici.
“Kosova e ka kodin e Procedurës Penale që e specifikon në mënyrë të qartë se si bëhet dorëzimi i ftesës. Ftesa ose i dorëzohet personalisht personit, apo e nënshkruan dikush i autorizuar nga ai”, tha tutje Krasniqi.
