Ministrja e Arsimit, Arbërie Nagavci, i është kundërpërgjigjur SBAShK-ut për nisjen e grevës më 25 gusht teksa kërkojnë shtesa prej 100 eurove për mësimdhënësit.
Nagavci, në një konferencë për media ka thënë se çdo kërkesë që shkakon humbje të mësimit për nxënësit është e papranueshme.
“SBAShK-u ka paralajmëruar grevën për 25 gusht duke e pranuar se e njohim organizimin sindikal, kërkesa për kushte më të mira të punës. Por, duhet theksuar se mos mbajtja e mësimit i dëmton më së shumti nxënësit dhe shkel të drejtën e tyre për arsim. Humbja e mësimit është cenim i të drejtës themelore të fëmijëve për arsim dhe si e tillë për ne është e papranueshme sepse në vazhdimësi jemi duke punuar dhe siguruar që të ofrojmë mbështetjen e nevojshme për mësimdhënësit tanë, por edhe të rezultateve të mësimdhënies”.
“T’ju kujtoj se SBAShKU ka një projektligj për pagat nga qeveria e kaluar me të cilin ishte pajtuar dhe ai kishte rezultat që mësimdhënësit e klasës së parë e deri në klasën e pestë të mbesin me një koeficient më të ulët. Ne jemi siguruar që jo vetëm të adresojmë kërkesat që i kemi mbështetur edhe në atë kohë që mësimdhënësit të trajtohen në mënyrë të dinjitetshme ashtu sikur të shtyjnë përpara përmirësimin e performancës duke e paraparë edhe shtesën për ata që do të jenë më të suksesshëm në punë. Në projektligjin e ri nuk do të ketë ndarje të tilla në mes mësuesve të klasave një deri në nëntë”.
“Të gjithë e dimë që kërkesa e kamotshme e SBASHK-ut ka qenë ligji i pagave dhe dihet se cili është pozicionimi i mësimdhënësve. Ligji është në shqyrtim dhe të gjitha kategoritë e arsimit janë trajtuar me një kujdes të veçantë sa i përket pagave”.
Tutje, Nagavci thotë se për plotësim të kërkesave duhet të shihet edhe matja e performancës së mësimdhënësve, teksa shton se nxënësit kosovarë asnjëherë në teste ndërkombëtare nuk kanë rezultatet që duam.
“Të gjithë jemi dëshmitarë që rezultatet e nxënësve tanë në teste ndërkombëtare janë dëshmuar që nuk janë ato që ne dëshirojmë, përtej kësaj pandemia ka shkaktuar humbje të mëdha në vitet e fundit në arsim dhe kjo ka ndikuar në rezultatet e mësim nxënies. Kjo tashmë është e dëshmuar me rezultate dhe raporte të institucioneve e organizatave kredibile ndërkombëtare që humbjet që janë shkaktuar në arsim nga pandemia janë të mëdha dhe duhet angazhim më i madh i të gjithë neve”, tha Nagavci.
Mes tjerash, ministrja bëri të ditur se të gjitha përgatitjet për nisjen e vitit të ri shkollor 2022/2023 janë në përfundim.
