Nga dita e sotme, më 1 dhjetor, ka filluar të zbatohet ligji i ri për pagat në sektorin publik.
Me këtë ligj do të rregullohet për herë të parë pagesa e të punësuarve që marrin paga nga buxheti i Kosovës.
Me këtë ligj, koeficienti më i lartë është 10 dhe më i ulëti është 1 dhe vlera monetare e koeficientit për vitin e parë do të jetë 239 euro.
Paga e presidentit, kryeministrit e shumë të tjerëve do të ulen.
Në bazë të Ligjit, presidenti i Kosovës pritet ta ketë pagën më të lartë dhe do të paguhet sipas koeficientit 10, derisa kryeparlamentari, kryeministri dhe kryetari i Gjykatës Kushtetuese do të paguhen me koeficientit 9.
Sipas koeficientit presidentit të Republikës, Hashim Thaçi do t’i zbritet paga aktuale nga 2,672 euro në 2,390 euro. Po ashtu, edhe kryeministrit në detyrë, Ramush Haradinaj që ka pagën aktuale 2950 euro, me ligjin e ri, paga e kryeministrit do të jetë me koeficientin 9 ose 2151 euro në muaj (799 euro më pak se paga aktuale).
Ligji për pagat në sektorin publik do të rrisë buxhetin për paga me rreth 120 milionë euro. Ndërsa, dallimi mes pagave, pensioneve dhe ndihmave sociale është mjaft i lartë.
Zyrtarët e Ministrisë së Financave, kanë bërë të ditur se buxheti është i mjaftueshëm për mbulimin e kostos financiare të paraparë me këtë ligj.
Sipas afateve ligjore, nga muaji dhjetor i këtij vitit, punëtorët e sektorit publik pritet të marrin pagat me rritje. Në bazë të këtij ligji, pagat në sektorin publik janë rritur për 70 për qind të punëtorëve.
Ministri në largim i Financave në Qeverinë e Kosovës, Bedri Hamza, kishte deklaruar për Radion Evropa e Lirë se pavarësisht situatës së krijuar politike me zgjedhjet, Ligji për pagat do të zbatohet në periudhën e paraparë.
“Nuk ka asnjë vështirësi për mbulimin e kostos sepse ka mjete të mjaftueshme buxhetore për kategorinë e pagave. Për vitin 2020, jemi në proces të përgatitjes së buxhetit dhe do shohim se ku do të jetë vlera e pagave. Ndërsa për vitet vijuese, krijohet hapësira si rezultat i rritjes ekonomike për të mbuluar koston e Ligjit të pagave pa ndonjë vështirësi”, thotë Hamza.
E njohësit e ekonomisë konsiderojnë se kjo rritje e pagave në sektorin publik mund ta dëmtojë sektorin privat në Kosovë.
Ligji për paga ishte miratuar nga Kuvendi i Kosovës më 2 shkurt.
