Kryetari i AKR-së, Behgjet Pacolli, ka thënë se Kosova është i vetmi vend ku i është ndaluar aterrimi me aeroplan.
Ai, në T7 të martën ka thënë se dikush po i shfrytëzon të rinjtë e vendit duke i përdorur ata.
“I ka shfrytëzuar të rinjtë me problemet e tyre. Ua ka shpërlarë trurin. I ka mbledhur dhe i ka qitë nëpër rrugë. Nëse shkon nëpër shkollat e tyre e shikon se ata janë nxënësit më të dobët. Ky është dëmi më i madh që i ka ndodhur Kosovës. Ka njerëz me mbiemër Pacolli, edhe pse flasin ashtu unë kërkoj falje në emër të tyre për shkak që mbajnë mbiemrin e familjes time. Popullata është duke besuar në doktrina të tilla“, ka thënë ai.
Pacolli ka kritikuar ish-kryeministrin e Kosovës, Albin Kurtin, në lidhje me deklarimin e qeverisë Kurti për arrestimin e kreut të AKR-së në qoftë se nuk do t’i respektonte vendimet anti-covid të asokohshme.
“Kryeministri i vendit doli në intervistë dhe tha se do të më arrestoj aty ku jam. E tha ai vetë. Nuk mund ta pranoj këtë fakt për një vend ku kam kontribuar shumë. Vetëdija e qytetareve është rritur. Unë shpresoj tek ta”, shtoi ai.
