Reagon Latifi ndaj deklaratës së Nitajt

Blerim Larifi, Këshilltar i Kadri Veselit, ka thënë se Partia Demokratike e Kosovës asnjëherë deri më tash s’e ka diskutuar heqjen pa kushte të taksës ndaj produkteve të Serbisë.

“Sa i përket qëndrimit të PDK’së, as në forumet e PDK’së, as në zyrën e Kryetarit të Kuvendit, asnjëherë, nuk është debatuar për heqjen e pakusht të taksës ndaj mallrave të Serbisë”, ka thënë Latifi, për Express, të dielën.

Reagimi i tij erdhi ka akuzave të deputetit të AAK’së, Muharrem Nitaj, i cili tha se zyrtarët e PDK’së e NISMA’s kanë dezertuar prej qëndrimit pro taksës ndaj Serbisë prej momentit kur erdhi kërkesa e SHBA’së për heqjen e saj.

Megjithëkëtë, Blerim Latifi ka thënë se kërkesa amerikane për heqjen e taksës ndaj produkteve serbe duhet të trajtohet me seriozitet maksimal shtetëror.

“Taksa është vendosur për të mirën e Kosovës. Vendosja e taksës nuk ka qenë demonstrim, përkundrazi, ka qenë vërejtje që të ndalet agresiviteti serb ndaj Kosovës në rrafshin ndërkombëtar”, ka thënë ai.

Ky zyrtar i Parlamentit të Kosovës u ka bërë thirrje zyrtarëve shtetërorë të jenë të kujdesshëm kur flasin për veprime strategjike të Shtetit.

“Vendimi për këtë taksë ka qenë vendim shtetëror dhe ecuria e mëtutjeshme e saj duhet të trajtohet me seriozitet maksimal shtetëror dhe duke mos lejuar që komentet e lira në portale dhe faqet e facebook’ut të zëvendësojnë arsyen shtetërore, nga kushdo”.

Muharrem Nitaj, Nënkryetar i AAK, ka thënë se ata që merrnin merita se kush vendosi taksën ndaj Serbisë e Bosnjës kanë dezertuar dhe janë fshehur.

Nuk ka përmendur emra, por, merita për këtë taksë kanë marrë zyrtarët e PDK’së e NISMA’s.

Së fundmi, Jakup Krasniqi i NISMA’s kërkoi të mos hiqet taksa edhe nëse shkarkohet Haradinaj.

Muharrem Nitaj ka pyetur nëse Ramush Haradinaj duhet të jetë i vetëm në betejën për mbrojtjen e taksës.

“Ra ky mort e u pamë dhe edhe ata që ende nuk kanë guxim të shprehen kundër taksës, nuk thonë “Kryeministër jemi ne ty”, por i sugjerojnë atij që më mirë të japë dorëheqje se sa ta heqë taksën. Thua që kjo taksë është e Ramush Haradinjat dhe vetëm ai duhet të luftoj e ta mbrojë atë”, ka thënë Nitaj, për Express.

Ky zyrtar i AAK’së është treguar i ashpër me udhëheqësit e PDK’së që po kërkojnë heqjen e taksës. Ka thënë se të njëjtit po flasin sikur taksa ishte kundër SHBA’së e BE’së.

“Madje qe vlerësuar si vendimi më i rëndësishëm i kësaj Qeverie, meritat për të cilin u munduan t’i marrin nga i pari te i fundit. Por pak ditë më vonë, e pas reagimit amerikan, ata që e kishin mbështetur, filluan të dezertojnë e të distancohen nga taksa, dhe të flasin sikur ajo ishte taksë kundër ShBA dhe BE! Prandaj a duhet që Kryeministri Haradinaj të shndërrohet në luftetarin e fundit edhe për mbrojtjen e kësaj takse, kur të tjerët tashmë po bëjnë sehir!”, ka shtuar Nitaj.

Ramush Haradinaj kishte dhënë fjalë të mëdha kur e kishte marrë vendimin për taksë. Ishte zotuar se nuk do ta hiqte këtë masë derisa Serbia të njohë Kosovën.

Mirëpo, presioni amerikan, duket se Kryeministrin do ta detyrojë që taksën ta heqë javën e ardhshme.

Qeveria Kosovës kishte marrë vendim për taksë ndaj produkteve serbe e boshnjake pasi Serbia kishte nisur një fushatë kundër njohjeve të Kosovës.Fillimisht ishte vendosur taksa 10 për qind për t’u vendosur në fund të vitit të kaluar në 100 për qind.

SHBA ka kërkuar pezullimin e menjëhershëm të taksës.

Presidenti i Kosovës, Hashim Thaçi, ka kërkuar dje të dëgjohet këshilla e amerikanëve. Ka thënë se SHBA nuk e ka të pakushtëzuar përkrahjen për Kosovën.

Madje, ka thënë se për teke të ndonjë lideri s’bën të rrezikohet partnertiti i Kosovës me SHBA’në.

Ndërkohë, sot, Jakup Krasniqi e ka këshilluar Ramush Haradinaj të shkojë vendi në zgjedhje e të mos hiqet taksa ndaj produkteve serbe e boshnjake pavarësisht kërkesave të Presidentit Hashim Thaçi, SHBA’së dhe BE.

“Në një situatë të tillë, për Kryeministrin e Kosovës, çdo variant i shkuarjes në zgjedhje është më i mirë, se sa heqja eventuale e taksës ndaj Serbisë. Kursi i ri duhet vazhduar!”, ka thënë Krasniqi, në një tekst të gjatë dërguar Gazetës Express.
Krasniqi ka thënë se gjithë ata që po kërkojnë heqjen e taksës – liderët e Kosovës – po e bëjnë këtë për interesa personale.

“…ata janë duke i mbrojtur interesat kryekreje personale e aspak shtetërore e kombëtare”, ka shtuar ai.

Krasniqi e ka krahasuar Presidentin e Kosovës Hashim Thaçi me ish-funksionarët shqiptarë në Jugosllavi. Ka thënë se ish-kreu i PDK’së po bën presin Qeverisë për interes personal që të hiqet taksa.

“Ai apo ata që taksën ndaj Serbisë e Bosnjës, sidomos ndaj Serbisë e konsiderojnë si një veprim a teke personale të një lideri shtetëror e cilat “teke nuk guxojnë të lëndojnë interesin tonë shtetëror dhe atë strategjik të SHBA-së”?! Diçka të tillë sikur të thoshin nostalgjikët e Beogradit, që nuk mungojnë në Kosovë, të cilët tani janë të heshtur, por që nxjerrin kokën kohë pas kohe, mbase edhe do të kuptoheshin disi”, ka shtuar ai.
Ish-Kryetari i Kuvendit ka thënë se Hashim Thaçi dhe zyrtarët e LDK’së janë mësuar të nënshtrohen derisa serbët të trimërohen.

Në anën tjetër, nënkryetari tjetër i AAK’së, Pal Lekaj, ka thënë dje se vendimi për mos heqjen e taksës me Serbinë nuk cenon raportet e Kosovës me Amerikën.

Në këtë mënyrë, Lekaj i është përgjigjur Presidentit Hashim Thaçi, i cili kërkoi nga Qeveria që të dëgjohet këshilla e SHBA’së për heqjen e takës.

“Të gjithë jemi krenarë për miqësinë që e kemi me Amerikën. Vendimet e institucioneve shtetërore, siç është ky për taksën, nuk e rrezikojnë miqësinë dhe koordinimin që e kemi që dhjetëra dekada me SHBA’në”, ka thënë Lekaj, për Express, të shtunën.

Lekaj ka thënë se askush s’mund t’i lëvizë raportet Kosovë-Serbi. Ka thënë se Ramush Haradinaj vetëm sa i ka thelluar këto raportet me amerikanët.

“Ashtu siç e kemi çliruar, e ndërtuar shtetin e Kosovës, bashkë me Amerikën do të vazhdojmë t’ua ruajmë sovranitetin nga jashtë dhe të zhvillojmë brenda. Miqësia jonë me Amerikën është e ndërtuar në themelet e dy popujve, të cilën vështirë se mund ta lëkund dikush. Kryeministri e ka dëshmuar në vazhdimësi bashkëpunimin me SHBA për të mirën e dy popujve”, ka shtuar ai.

Edhe Blerim Kuçi, ka thënë se taksa me Serbinë ka arritur efektet në aspektin politik dhe ekonomik.

Mirëpo, nuk ka dashur të komentojë nëse Qeveria e Kosovës duhet të pezullojë përkohësisht taksën siç kanë kërkuar amerikanët.

“Si deputet, taksa i ka arritur efektet. Ka qenë njëri prej potezave, jo vetëm në aspektin ekonomik, por i ka dhënë dinjitet Kosovës. Duhet të shfrytëzohet maksimalisht në raport me Serbinë”, ka thënë Kuçi, për Gazetën Express.

Departamenti i Shtetit, në fund të vitit të kaluar i kishte shkruar Kryeministrit të Kosovës që të heq taksën.

Është përsëritur e njëjta kërkesë drejtuar udhëheqësve të Kosovës edhe nga Ambasada në Prishtinë. Është thënë se Amerika kërkon pezullimin e menjëhershëm të taksës.

“Shtetet e Bashkuara kanë kërkuar prej lidershipit të Kosovës në mënyrë të përsëritur që të pezullojë menjëherë taksën për mallrat nga Serbia dhe Bosnjë-Hercegovina. Siç kemi thënë, ne nuk shohim ndonjë përfitim të Kosovës nga këto masa. Ne fuqishëm inkurajojmë ripërtëritjen e fokusimit në qëllimet thelbësore të Kosovës- të ardhmen evropiane dhe normalizimin e marrëdhënieve me Serbinë”, thuhet në përgjigjen e Ambasadës amerikane, dërguar “Kohës Ditore”.