Anëtari i LDK-së Naser Rugova një ditë pas zgjedhjeve dhe humbjes së thellë që pësoi partia e tij, ka thënë se tani është koha që Albin Kurti të mbajë premtimet e të mos viktimizohet më.
Ndërsa ka kërkuar nga deputetët e LDK-së që të qëndrojnë në sallë në momentin kur Vjosa Osmani kërkon besimin nga ta për tu bërë presidente. E tërë kjo sic ka thënë Rugova në mënyrë që të bie maska e saj e të kuptohet nga të gjithë se gjithë histeria e saj ishte vetëm për poste e përfitime personale.
Ai po ashtu ka kërkuar nga garda e vjetër e LDK-së që të lëshojnë rrugë, meqë mesazhi i qytetarëve ishte i qartë.
Postimi i plotë i tij:
Tre fjali për rezultatin dje.
1. Urime fituesit. Urojmë që Albini të mbajë premtimet dhe të mos viktimizohet më tutje. Tani e ka kohën që të përqafojë përgjegjësinë që ia kanë dhënë qytetarët dhe të mos aktrojë më.
2. Sa për Vjosën. Mendoj që deputetët e LDK-së duhet të rrinë në sallë dhe t’ia bëjnë kuorumin për zgjedhjen e Presidentit. Është shumë me rëndësi që maskat të bien deri në fund dhe që, të gjithë ata votues të LDK-së që i besuan, ta kuptojnë se e tëra, gjithë histeria e saj, ishte vetëm për poste dhe përfitime personale. Në demagogjinë e saj nuk ka as edhe një pikë sinqeriteti dhe kjo do të shihet edhe më shumë në periudhën që kemi para.
3. I përshëndes deklaratat e Kryetarit Mustafa dhe Kryeministrit Hoti, megjithatë duhet ta theksoj që nuk kemi kohë për të humbur. Elektorati ynë na ka dënuar dhe ky mesazh është kristal i qartë. Zgjedhjet në total, por edhe disfata jonë në bastionet tona tregon që komplet garda e vjetër, që me vite tani po i ik reflektimit, duhet të japë dorëheqje dhe të largohen menjëherë. Të rinjtë dhe të ardhurit në parti, që e kanë ndihmuar këtë strukturë të vjetër brenda partisë sonë, duhet të reflektojnë dhe të mësojnë nga kjo përvojë. Ka ardhur koha të ndahemi përgjithmonë nga arroganca, narcizmi dhe egot e sëmura.
Le të reflektojmë, le të veprojmë dhe le të kthehemi më të fuqishëm se para.
LDK është pasuri fundamentale e këtij populli.
