SBASHK-u dyshon se partia Nisma po i përçan mësimdhënësit

0
208

Një iniciativë e mësimdhënësve të arsimit fillor nga klasa 1-5 për ta kundërshtuar Ligjin për paga ka ngritur dyshime tek drejtues të Sindikatës së Bashkuar të Arsimit, Shkencës dhe Kulturës (SBASHK), se një gjë e tillë është nxitur nga partia Nisma Socialdemokrate.

Si kundërshtim ndaj Ligjit për paga, pak ditë pas miratimit të tij në Kuvend, një grup mësimdhënësish kishin nisur mbledhjen e nënshkrimeve duke kërkuar mosdekretimin tij. Lista me rreth 4 mijë nënshkrime është dërguar dy javë më parë tek presidenti, kryeparlamentari, kryeministri e Ministria e Arsimit, Shkencës dhe Teknologjisë (MASHT), shkruan sot “Koha Ditore”.

Në krye të iniciativës së mësimdhënësve të pakënaqur me Ligjin është mësimdhënësi Xhavit Lani, që njëherësh është anëtar i partisë së ministrit të arsimit, Nisma Socialdemokrate.

Një gjë e tillë, sipas kryetarit të SBASHK-ut, Rrahman Jasharaj, lë dyshime se kjo parti po i shtyn mësimdhënësit që të mos e pranojnë Ligjin. Kjo, sepse një ditë para miratimit të Ligjit, SBASHK-u kishte arritur një marrëveshje në Zyrën e kryetarit të Kuvendit, Kadri Veseli, për ngritje koeficientesh, por aty mungonin përfaqësues të Nismës dhe MASHT-it. Me këtë marrëveshje ishte ndalur edhe greva 3-javore në arsim.