Serbia ua ka refuzuar hyrjen ministres së Arsimit, Arbërie Nagavci, ministrit të Financave, Hekuran Murati , ministrit të Kulturës, Hajrullah Çekut dhe ministrit të Infrastrukturës, Liburn Aliu.
Aliu me anë të një postimi në rrjetin social Facebook ka shkruar se Serbia ua ka refuzuar pa asnjë arsye kërkesën për vizitë në Medvegjë, Bujanoc dhe Preshevë në momentin para nisjes.
“Duke filluar nga sot, bashkë me ministrat, Arbërie Nagavci, Hekuran Murati dhe Hajrullah Çeku, planifikonim të fillonim vizitën dy ditore, në Medvegjë, Bujanoc dhe Preshevë. Vizita jonë, nga autoritetet në Beograd, u refuzua, pa asnjë arsyetim pak para nisjes së delegacionit tonë”.
“Në harmoni me procedurat dhe marrëveshjen në Bruksel, ne kemi bërë kërkesë të rregullt me datë 24 Nëntor, duke prezantuar edhe agjendën e vizitës. Refuzimi na është bërë sot në oren 07:13. Në përgjigjen negative të marrë përmes zyrës sonë ndërlidhëse në Beograd, nuk shprehet asnjë arsye, për refuzimin”.
Ai ka shtuar se arsyeja e kësaj vizite ishte festa e 28 nëntorit.
“Agjenda e aktivitetit të planifikuar, përfshinte vizitën, në datat 27 dhe 28 Nëntor, në të tre komunat e banuara me shqiptarë dhe takime me kryetarët e komunave, përfaqësuesit në parlament, në nivelin lokal dhe me krerët e subjekteve politike”.
“Refuzimi i kërkesës është pengim i hapur për të ndihmuar qytetarët e diskriminuar shqiptarë në Preshevë, Medvegjë dhe Bujanoc”,ka thënë Aliu.
