U.d. së ministrit të Punëve të Brendshme, Xhelal Sveçla, ka deklaruar se ka kërkuar nga organet e drejtësisë zbardhjen e rastit të vdekjes së 26-vjeçarit që u hodh nga kati i pestë i konviktit në Qendrën e Studentëve.
Përmes një postimi në Facebook ai i ka bërë thirrje Prokurorisë që rastin ta trajtojë me prioritet.
“Dje jemi ballafaquar të gjithë, si individë, si familjarë, si institucione e si Republikë me lajmin tragjik mbi shuarjen e një jete të re. Dua t’ju informoj që në pajtim me kompetencat e mia, kam kontaktuar drejtorin e Policisë dhe kam kërkuar angazhim maksimal të Policisë në hetimin e këtij rasti. Ju siguroj që të gjitha masat që janë në dispozicion të Ministrisë së Punëve të Brendshme dhe Administratës Publike do të ndërmerren pa asnjë hezitim”, ka thënë ai.
Sveçla iu ka shprehur ngushëllime familjarëve.
