Ka nisur seanca e jashtëzakonshme e Kuvendit të Kosovës, e thirrur sot nga partitë opozitare.
Në hyrje të seancës, kryetari i Kuvendit, Glauk Konjufca, ka deklaruar se thirrja e seancës së jashtëzakonshme është dorëzuar vetëm para një ore, por është miratuar për shkak të respektit që Konjufca ka thënë se ka për opozitën.
Deputeti nga Aleanca për Ardhmërinë e Kosovës, Besnik Tahiri, ka deklaruar se shtrenjtimi i energjisë elektrike po prek klasën e mesme, duke e dëmtuar atë.
Ai ka kritikuar edhe mungesën e deputetëve të Lëvizjes Vetëvendosje, ministrave dhe kryeministrit në seancën e jashtëzakonshme, duke thënë se kjo dëshmon se shtrenjtimi i energjisë elektrike është bërë me direktivën e Qeverisë.
“Mungesa e deputetëve e ministrave dëshmon se shtrenjtimi i energjisë elektrike është bërë me direktivën e Qeverisë, me direktiva në dëm të qytetarëve të Kosovës”, ka deklaruar ai.
