Të shtunën, bëhen një javë nga varrimi i Qerim Kelmendit ish – luftëtarit të UÇK’së që u vra më 27 shkurt në ora 1:00 pas mesnatës afër, shtëpisë së tij në Zahaq. Por, për shkak se kufoma ka qenë e karbonizuar as familja e as organet e hetuesisë s’kanë mundur të konfirmojnë se trupi i të vdekurit është i Qerim Kelmendit. Vëllai i Qerimit, Osmani, në një prononcim për Express, ka thënë se janë duke i pritur rezultatet e ADN’së. Të njëjtën e ka phuar edhe kryeprokurori Agim Kurmehaj.
Në kompleksin memorial në Gllogjan të Deçanit me nderime shtetërore në mesditën e së shtunës që shkoi është varrosur Qerim Kelmendi.
Ish-luftëtari i UÇK’së, u gjet i vdekur në makinën e djegur në fshatin e tij në Zahaq të Pejës më 27 shkurt pas orës 1 të mesnatës.
Por, Prokuroria që po kryen hetime rreth rastit, nuk ka arritur ta konfirmojë me saktësi nëse trupi i gjetur në veturën e bërë shkrumb e hi, që u gjet disa metra larg shtëpisë të së ndjerit, ishte i Kelmendit.
Familja e të ndjerit identifikimin e të ndjerit e ka bërë vetëm duke u bazuar në makinën pronar i së cilës ishte Kelmendi, e që çon në konkludimin se Qerim Kelmendi ishte personi i vrarë.
Gazeta Express, pak ditë pas kësaj ngjarje të rëndë, ka kërkuar të dhëna nga Prokuroria e Shtetit se deri ku kanë arritur hetimet për këtë rast dhe nëse është vërtetuar nëse trupi i karbonizuar brenda veturës së gjetur në Zahaq ka qenë i Qerim Kelmendit.
Kryeprokurori i Pejës, Agim Kurmehaj, i tha gazetës së dyshimet e para se personi i cili u gjet i vrarë në makinë janë se bëhet fjalë për Qerim Klemendin. Por, sipas tij, Prokuroria po i pret analizat e ADN’së dhe ekspertizat e tjera, për të parë nëse bëhet fjalë për të njëjtin person.
“Ne jemi ende në fazën e hetimeve. Dyshimet e para janë se personi i vrarë në veturën e djegur është Qerim Kelmendi. Ne jemi duke i pritur analizën e ADN’së dhe ekspertizat e tjera për ta vërtetuar nëse bëhet fjalë për të njëjtin person”, ka deklaruar Kurmehaj.
Prokuroria e Pejës i tha po ashtu Expressit se ende janë në fazën fillestare të hetimeve dhe në pritje të ekspertizave të nevojshme.
“Lidhur me ketë rast është i angazhuar prokurori i çështjes se bashku me të gjitha njësitet relevante policore dhe janë duke u ndërmarrë të gjitha veprimet e nevojshme hetimore dhe janë në proces ekspertizat përkatëse që të vihet deri tek rezultatet konkrete në zbulimin e kryerësve të mundshëm të kësaj vepre penale”, deklaruan nga Prokuroria e Pejës.
Familjes zyrtarisht nuk i është konfirmuar se i vrari është Qerim Kelmendi
Familja Kelmendi tashmë ka përfunduar të pamën për familjarin e tyre. Zyrtarisht nga institucionet kompetente, familja, ende nuk ka marrë ndonjë të dhënë se personi i vdekur i cili u gjet në veturë ka qenë Qerimi.
Vëllai i së ndjerit, Osman Kelmendi, ka deklaruar se në bazë të makinës ata e kanë marrë vesh se personi i vdekur në makinë është Qerim Kelmendi.
“Në bazë të tabelave të makinës. Akush tjetër nuk e ka vozitë veturën. Gruaja, por ajo ka qenë në shtëpi. Kjo procedura me ADN’n eshte duke vazhduar akoma. I kanë marrë mostrat e ADN’së të motrës, motra ka qenë binjake, të vajzës. Tash po presim. Shumë shpejt pritet që t’i kemi rezultatet”, thotë ai.
Ai deklaron se një trup të karbonizuar e kanë futur në arkivol, por në të nuk ka pasur as një shenjë se trupi i varrosur ka mundur të jetë i Qerimit.
“Trupi i karbonizum ka qenë, e kemi fut në arkivol. Ai (Qerimi) nuk ka mbajte aksesor. Zyrtarisht ne akoma nuk e kemi një shkresë zyrtare shkencore, e cila e vërteton se i ndjeri është po ai. Tash po presim. Ne kemi durim po presim. Mostrat e ADN ‘së janë dorëzua”, thotë vëllai i të ndjerit.
Megjithëse, ata besojnë se vëllai i tyre është vrarë.
“Ne besojmë që personi i vrarë në veturë ka qenë Qerimi. Spekulime ka gjithandej”, ka thënë ai për Express.
E në mesnatën e 27 shkurtit në rrugën “Bekim e Blerim Kelmendi”, në Zahaq të Pejës një veturë e djegur. Vrasësit potencial të kësaj vepre ende nuk janë zbuluar.
