Me rastin e 20 vjetorit të rënies së dëshmorit, Gëzim (Rasim) Rama, sot është bërë zbulimi i pllakës përkujtimore në vendin e rënies së tij, në fshatin Stroc të Komunës së Vushtrrisë, raporton Fokusi.info.
Në përkujtim të dëshmorit morën pjesë: Përfaqësues të shoqatave të dala nga lufta e Ushtrisë Çlirimtare të Kosovës nga niveli qendror dhe lokal, përfaqësues të institucioneve qendrore dhe komunale, pjesëtarë të FSK-së, Policisë së Kosovës, bashkëluftëtarë, qytetarë dhe familjarë.
Gëzim Rama është dekoruar nga Presidenti i vendit Hashim Thaçi me titullin “Hero i Kosovës”, ku me këtë rast familjes iu dhurua dekorata nga Ismail Syla, këshilltar i Presidentit, i cili edhe mbajti një fjalë rasti.
Fjalë rasti mbajtën edhe: Xhavit Jashari, kryetar i Shoqatës së Familjeve të Dëshmorëve, Xhafer Tahiri, kryetar i Komunës së Vushtrrisë, komandanti i Batalionit të Parë të Brigadës 142 të Zonës Operative të Shalës, Aziz Bici, zv/komandanti i Batalionit të Parë të Brigadës 142 të Zonës Operative të Shalës, Behram Rrahmani, kryetari i Shoqatës së Familjeve të Dëshmorëve-dega në Vushtrri, Gëzim Zuçaku.
Me këtë rast, këngëtari Besim Haliti dhe Xhevdet Shala kënduan këngë kushtuar dëshmorit, Gëzim Rama.
Dëshmori Gëzim(Rasim) Rama ishte ushtar i Batalionit të Parë të Brigadës 142 të Zonës Operative të Shalës të UÇK-së, i cili u vra më 10 prill 1999 në vendin e quajtur “Dardha e Kuqe” në fshatin Stroc të Vushtrrisë, në lagjën “Hasani”. Trupin e Gëzimit e tërheqin bashkëluftëtarët e tij dhe në mbrëmjen e 10 prillit e varrosin me nderime ushtarake në vendin e quajtur “Rrahu i Selmanit” mbi fshatin Stroc.