Zëvendësministri i Mbrojtjes, Agim Çeku, sot është liruar nga detyra nga kryetari i partisë së tij, Kadri Veseli, për shkak të aktakuzës që ka në prokurori për rastin e veteranëve të rrejshëm.
Ai për klankosova.tv ka thënë se është viktimë e një qasje të re të PDK-së.
“Është një qasje e re e dakorduar e partisë. Unë tash jam vitkimë e asaj qasje. Aktakuza nuk ka të bëjë as me korrupsion as me nepotizëm, por nuk më mbetet tjetër veç ta respektoj këtë vendim”.
Kryetari i Partisë Demokratike të Kosovës, Kadri Veseli, ka larguar sot nga të gjitha pozitat partiake dhe institucionale zyrtarët e PDK-së që kanë aktakuza të konfirmuara nga institucionet e drejtësisë.
Veseli tha se sot i ka liruar nga detyra të gjithë të emëruarit e PDK-së që kanë aktakuza dhe që mbajnë pozita në institucionet publike.
Largimet i pati paralajmëruar edhe në Konventën Festive të PDK-së të mbajtur të hënën.
