Arsenal ka shënuar fitore të mundimshme në kuadër të Ligës së Evropës, në ndeshjen që e luajti para tifozëve të vet.
Arsenal fitoi 3 – 2 kundër skuadrës së Vitoria de Guimares, në një ndeshje ku edhe pritej që londinezët të merrnin tri pikët.
Golin e parë në këtë takim e shënuan mysafirët, qysh në minutën e 8’, me anë të Marcus Edwards.
Gabriel Martinelli u kundërpërgjigj nga ana e Arsenal, duke shënuar golin e barazimit në minutën e 32’ të takimit.
Por, pas vetëm 4 minutave, Bruno Duarte riktheu epërsinë e mysafirëve, për të befasuar për herë të dytë Arsenalin.
Transferimi më i shtrenjtë i Arsenal, Nicolas Pepe, arriti që të dërgonte topin në rrjetë në minutën e 80’, nga gjuajtja e lirë për të barazuar përsëri shifrat.
Goli i dytë i Pepe ishte ai që vulosi fatin e këtij takimi. Francezi realizoi në minutat shtesë të takimit, përsëri nga gjuajtja e lirë, për të bërë që Arsenal të marrë tri pikët.
Arsenal numëron tashmë 9 pikë në pozitën e parë, kurse Guimares nuk ka fituar akoma pikën e parë, në tri ndeshje të luajtura.
https://www.youtube.com/watch?v=y2ozNMlo2oc
