Bashkimi Evropian ka njoftuar se diskutimi dhe propozimet për kushtet e vendosura nga kryeministri i Kosovës, Albin Kurti për formimin e Asociacionin, duhet të bëhen në kuadër të dialogut.
“Dialogu Kosovë-Serbi është një hapësirë ku palët mund të diskutojnë dhe të bëjnë propozime në lidhje me formimin e Asociacionit të komunave me shumicë serbe”, kanë thënë Bashkimi Evropian.
Zëdhënësi i BE-së për politikën e jashtme dhe sigurinë, Peter Stano, theksoi gatishmërinë e bllokut evropian për të lehtësuar diskutimet mbi Asociacionin gjatë takimeve të ardhshme.
“Kemi marrë parasysh komentet e kryeministrit Kurti lidhur me Asociacionin e Komunave me shumicë serbe, të paraqitura në Kuvendin e Kosovës më 2 shkurt. Në kuadër të dialogut është edhe një takim ku do të diskutohet për krijimin e Asociacionit, si dhe çdo propozim që kanë të dyja palët. BE-ja është e gatshme të lehtësojë diskutimet për Asociacionin në takimet e ardhshme”, tha Stano.
Qeveria njoftoi se presin që këto çështje të zgjidhen në kuadër të propozimit evropian në takimet e ardhshme.
“Ne kemi para nesh një propozim evropian që thamë se është i pranueshëm si një bazë e mirë për diskutime të mëtejshme dhe një platformë solide për të ecur përpara. Ne presim që takimet e ardhshme në Bruksel, kurdo që të zhvillohen, të jenë një mundësi e mirë për të trajtuar çështjet në kuadër të propozimit evropian që kanë të bëjnë me garancitë ndërkombëtare, mekanizmat e zbatimit dhe kohën. Kushtëzimi i mundshëm i Serbisë për takimet në Bruksel me diskutimin e Asociacionin padyshim që duhet të interpretohet si përpjekje e Serbisë për të shmangur diskutimet për planin evropian, të cilin tashmë e ka refuzuar si të tillë”, tha zëdhënësi i Qeverisë së Kosovës, Përparim Kryeziu.
