Një person ka humbur jetën të hënën gjatë një aksidenti që ka ndodhur në fshatin Grabovc të Fushë Kosovës.
Në aksident ku ishin të përfshirë një veturë dhe një autobus, i cili ishte duke transportuar punëtorët e KEK-ut janë lënduar edhe dy persona të tjerë, shkruan fokusi.info.
Fokusi.info mësoi se viktima është A.K. nga fshati Zhilivodë i Komunës së Vushtrrisë.
Policia në raportin 24 orësh ka njoftuar se me urdhër të prokurorit të shtetit trupi i pajetë i viktimës është dërguar në Institutin e Mjekësisë Ligjore për obduksion, ndërsa i dyshuari ngasësi i autobusit është dërguar në mbajtje për 48 orë.
Pas raportimeve se në aksident ishte përfshirë autobusi i Korporatës Energjetike të Kosovës kjo e fundit ka sqaruar se kanë kontratë për transportin e punëtorëve me tri kompani.
“Në aksidentin që ka ndodhur dje në Grabovc ka qenë e angazhuar Konzorciumi DITA & JONI TRAVEL. Bazuar në informatat nga projekt menaxheri i kontratës, në kohën e aksidentit në autobus kanë qenë rreth 50 punëmarrës të Korporatës dhe fatmirësisht nuk ka pasur të lënduar”.
“Pavarësisht së gjithash, në aksidentin e ndodhur dje në mes të një veture private dhe Autobusit të Konzorciumit DITA & JONI TRAVEL, fatëkeqësisht ka humbur jetën një qytetarë i Republikës së Kosovës dhe me këtë rast KEK-u i shpreh ngushëllimet më të sinqerta familjes së të ndjerit”, thekson kjo kompani, transmeton fokusi.info.
