Ministri i Jashtëm i Rusisë, Sergei Lavrov ka thënë se “operacioni special ushtarak” në Ukrainë po “zhvillohet rreptësisht sipas planit” – pavarësisht pretendimeve Perëndimore për të kundërtën.
Duke folur për agjencinë kineze të lajmeve Xinhua, Lavrov thekosi se qëllimet e Rusisë “me siguri do të arrihen”.
Dje një zyrtar i lartë i mbrojtjes amerikane tha se fushata ruse për të marrë kontrollin e rajonit të Donbasit ishte “të paktën disa ditë prapa aty ku ata donin të ishin”, me përparim “të ngadaltë dhe të pabarabartë”.
Për bisedimet e paqes, megjithëse ato nuk janë zhvilluar ballë për ballë për disa javë, Lavrov tha se diskutimet për një draft të një traktati të mundshëm po diskutoheshin çdo ditë me video-konferencë.
“Ne jemi për vazhdimin e negociatave edhe pse nuk po shkojnë mirë”, tha ai, shkruan BBC, transmeton Klankosova.tv.
Lavrov akuzoi Shtetet e Bashkuara dhe vendet e NATO-s se e konsiderojnë Ukrainën si një “mjet” për të frenuar Rusinë dhe tha se ata e kishin detyruar Kievin të bënte një “zgjedhje artificiale, të rreme: ose me Perëndimin ose me Moskën”.
“Nëse SHBA dhe NATO janë vërtet të interesuara për zgjidhjen e krizës në Ukrainë, atëherë para së gjithash, ata duhet të zgjohen dhe të ndalojnë furnizimin e regjimit të Kievit me armë dhe municion”, tha Lavrov.
