Përfaqësuesi Special i BE-së për Dialogun Beograd-Prishtinë dhe çështje të tjera rajonale të Ballkanit Perëndimor, Miroslav Lajçak, do të vizitojë Kosovën më 31 maj dhe 1 qershor 2021. Kështu kanë bërë të ditur nga zyra e BE-së në Kosovë, por kësaj radhe ai ka marrë me vete ‘përforcime’ pasi më të do të jetë edhe Matthew Palmer, zëvendësndihmës Sekretari i Shtetit i SHBA’ve.
Në anën tjetër, është bërë e ditur edhe agjenda e takimeve të Lajçak në Kosovë.
Gjatë vizitës së tij dy-ditore të punës, ai do të takohet me Presidenten Osmani, Kryeministrin Kurti, Zëvendës Kryeministrin e Parë për Integrim Evropian, Zhvillim dhe Dialog Besnik Bislimi, Zëvendës Kryeministren e Dytë dhe Ministren e Punëve të Jashtme dhe Diasporës Gërvalla-Schwarz.
Lajçak gjithashtu do të takohet me komunitetin ndërkombëtar në Kosovë dhe do t’u drejtohet Shefave të Misioneve të BE-së.
Për vizitën, Përfaqësuesit Special të BE-së Lajçak do t’i bashkohet Zëvendës Ndihmës Sekretari i Shtetit të SH.B.A.-ve në Byronë e Çështjeve Evropiane dhe Euroaziatike me përgjegjësi për Ballkanin Perëndimor dhe Egjeun dhe Përfaqësuesin Special për Ballkanin Perëndimor, Matthew A. Palmer. Ata së bashku do t’i drejtohen mediave të Martën, 1 Qershor, në 10:45 në zyrën e BE-së.
Gjatë vizitave të kaluara në Kosovë, Lajçak nuk ka arritur të ketë shumë suksese në bindjen e Kosovës rreth rifillimit dinamik të dialogut me Serbinë, ndërsa kësaj radhe duket se ai ka kërkuar mbështetjen e SHBA’ve në këtë drejtim.
