Pesë zyrtarët e ministrisë së Bujqësisë që ishin arrestuar për vepra të ndryshme korruptive, përfshirë keqpërdorim të detyrës zyrtare dhe marrje ryshfeti janë pezulluar nga puna.
Kjo është bërë e ditur me anë të një komunikate për media nga kjo ministri, teksa u tha se kjo është bërë me kërkesë të ministrit të këtij dikasteri, Faton Peci.
Vendimi për pezullimin nga puna do të jetë në fuqi deri në një vendim tjetër.
Postimi i plotë:
Me kërkesën e ministrit të Bujqësisë, Pylltarisë dhe Zhvillimit Rural, Faton Peci, për vendosjen e ligjshmërisë dhe rendit brenda institucionit, është marrë vendimi për pezullimin e përkohshëm nga marrëdhënia e punës në shërbimin civil të Kosovës për pesë zyrtarë të Agjencisë së Zhvillimit të Bujqësisë.
Ky vendim është marrë si domosdoshmëri për zbatimin e bazës ligjore në fuqi, si dhe njoftimit të marrë nga Drejtoria për Hetimin e Krimeve Ekonomike dhe Korrupsion të datës 03 mars 2021, për masat e ndërmarra ndaj këtyre zyrtarëve, të cilët dyshohen për veprat penale “marrje e ryshfetit” dhe “keqpërdorim i detyrës zyrtare”.
Vendimi për pezullimin nga marrëdhënia e punës do të jetë në fuqi deri në marrjen e një vendimi tjetër nga organet përgjegjëse.
Zyrtarët e pezulluar ishin arrestuar gjatë muajit shkurt nën dyshimin për veprat penale “marrje e ryshfetit” dhe “keqpërdorim i detyrës zyrtare”.
