Melihate Tërmkolli thotë se me mos fillimin e vitit shkollor po vëhet në lojë jeta e fëmijëve.
Përmes një shkrimi në “Facebook”, Tërmkolli thotë se zhvillimi i procesit mësimor e arsimor në radhë të parë është detyrë e Qeverisë.
Në anën tjetër, Tërmkolli shkruan se është koha që mësuesit të gjejnë modalitet për ta detyruar Qeverinë që të plotësojë kërkesat e tyre dhe të merret seriozisht me çështjen e arsimit.
Tërmkolli paralajmëron se nëse mësimi nuk fillon nga java tjetër, vendi mund të futet në ujëra të turbullta.
Postimi i plotë:
Boll me arrogancë, boll me grevë, boll me drama!
Dramat, dramatizimet e viktimizimet personale me grevën në arsim duhet të ndalen.
Kur vëhet në lojë jeta dhe prosperiteti i fëmijëve, e ardhmja e tyre, nuk ka heronj, ka vetëm antiheronj. Viktima janë fëmijët tanë.
Një udhëheqje e shkërmoqur e Sindikatës së Arsimit dhe një Qeveri kapricioze e arrogante, e paaftë për të ushtruar përgjegjësitë e saj, nuk mund t’i sakrifikojnë më tutje fëmijët në “luftën” e tyre, për interesat e tyre. Zhvillimi i procesit mësimor e arsimor është në radhë të parë detyrë e Qeverisë, MASHT-it.
Në situatën në të cilën gjendemi, mbase është koha që vetë mësuesit e profesorët të gjejnë modalitete për ta detyruar Qeverinë që të plotësojë kërkesat e tyre dhe të merret seriozisht me çështjen e arsimit, pa dëmtuar fëmijët.Po nuk filloi mësimi nga kjo e Hane, vendi mund të futet në ujëra të turbullta nga të cilat vështirë mund të dilet pastaj.
