Në Hagë është mbajtur konferenca e radhës për ecurinë e çështjes ndaj ish-krerëve të Ushtrisë Çlirimtare të Kosovës, pas zgjerimit të aktakuzës nga Zyra e Prokurorisë Speciale.
Seanca ka filluar me prezantimin e palës mbrojtëse, si dhe përfaqësuesve të Prokurorisë dhe Gjykatës.
Ish-presidenti Hashim Thaçi është duke e ndjekur këtë konferencë përmes video-lidhjes.
Gjykatësi i procedurës paraprake, Nicolas Guillou tha se Thaçi do të informohet se brenda 30 ditësh mund të vetdeklarohet për fajësinë apo pafajësinë, por edhe se të njëjtin deklarim mund ta bëj edhe gjatë kësaj seance.
I pyetur nga gjykatësi Guillou se a ka pranuar aktakuzën e konfirmuar të datës 29 prill 2022, e cila përmban ndryshimet, pra akuzat e reja, Thaçi e konfirmoi këtë.
Më pas, i erdhi radha leximit të akuzave nga sekretarja e gjykatës, por me propozim të mbrojtjes dhe aprovim të Thaçit, ata kanë bërë të ditur se nuk kanë nevojë të lexohen akuzat e reja.
E më pas, gjykatësi Guillou tha se kërkon nga sekretarja të mos i lexoj akuzat e reja.
I pyetur se a i kupton akuzat e reja në aktakuzën e konfirmuar, Thaçi deklaroi se nuk i ka kuptuar pasi nuk ka pasur mundësi t’i lexojë sepse janë shumë të redaktuara.
Avokati Gregory Kehoe tha se akuzat janë shumë të redaktuara dhe kjo e bën klientin e tij dhe të akuzuarit e tjerë të mos kenë mundësi të kuptojnë se çfarë saktësisht po paraqet Prokurori i Specializuar.
“Me këto redaktime është e pamundur të kuptohet nga ai se për çfarë bëhet fjalë dhe ne i kemi kaluar këto me Thaçin, i kemi diskutuar këto çështje dhe kemi thënë se do të vetdeklarohet i pafajshëm në këtë moment”, tha Kehoe.
Ndërsa, Thaçi tha se nuk dëshiroj të shtoj diçka dhe u deklarohet i pafajshëm, megjithëse lëndën nuk e ka lexuar e kuptuar, por se deklarohet i pafajshëm.
“Duke pas parasysh këto redaktime, Thaçi po deklarohet i pafajshëm”, tha Kehoe.
Gjyqtari tha se është e vërtetë që ka redaktime në aktakuzë dhe se ato janë miratuar nga gjykata.
Tutje, gjyqtari Guillou, i lexoi Thaçit të gjitha të drejtat e tij të garantuara me ligj, për të cilat ai tha se i ka kuptuar të njëjtat.
“Do të kërkoj zyrtarisht të më thoni nëse deklaroheni fajtor apo jo fajtor lidhur me akuzat e reja që përmban aktakuza e ndryshuar”, tha Guillou.
“Zoti gjyqtar theksova edhe njëherë amendamentet e juaja shtesë janë të redaktuara, jam munduar t’i lexoj, nuk kam arritur, prandaj nuk kam mundur edhe t’i kuptoj dhe deklarohem i pafajshëm”, tha Thaçi.
Në fund, avokati Kehoe, deklaroi se ende apeli që kanë bërë për mangësitë në formën e aktakuzës është në Dhomën e Gjykatës së Apelit dhe nuk kanë marrë akoma përgjigje.
“Po kështu është edhe çështja tjetër për afatin e mocioneve sipas rregullës 94”, tha Kehoe.
Gjykatësi tha se afatet do të fillojnë nga dita e sotme.
