Presidentja e Kosovës, Vjosa Osmani, ka bërë sot kërkesën më të paprecedentë në historinë e presidentëve të Kosovës.
Ajo i është bindur plotësisht Lëvizjes Vetëvendosje të Albin Kurtit, me të cilën garoi në zgjedhjet e fundit parlamentare të 14 shkurtit.Presidentja Osmani i ka kërkuar dorëheqjen Kryetares së KQZ-së, Valdete Daka.
Kërkesa i është paraqitur zonjës Daka nga vetë Presidentja Osmani në zyrën e saj, mëson Gazeta Insajderi nga burime brenda Presidencës së Kosovës. Osmani nuk ka dhënë asnjë arsye bindëse në kërkesën e saj.
Madje, është e çuditshme se pasi i ka kërkuar dorëheqjen, Presidentja Osmani i ka thënë Kryetares së KQZ-së se nëse e pranon të dorëhiqet ajo do t’i ndajë mirënjohje publikisht për punën e saj. Presidentja Osmani i ka premtuar Kryetares së KQZ-së se në këmbim të dorëheqjes do të mbesin sërish në bashkëpunim.Merret vesh se Kryetarja e KQZ-së ka qenë e prerë në përgjigjen e saj. Ajo ka refuzuar kategorikisht këtë kërkesë të Presidentes, duke i thënë se e ka kryer punën e Kryetares së KQZ-së në përputhje me Kushtetutën e Republikës së Kosovës.
Insajderi ka raportuar pak më parë se mbledhjeve të fundit, Kryetarja e KQZ-së është përballur me presionin e anëtarëve të VV-së në KQZ, Sami Kurteshi dhe Alim Rama, të cilët kanë penguar zhvillimin e mbledhjeve.Gazeta për krejt këto çështje ka kërkuar përgjigje nga Presidenca, por ende nuk ka dhënë asnjë përgjigje.
