Pretendimet për vrasjen e civilëve nga UÇK-ja në shtator të vitit 1998 dhe të pasqyruara në raportin e Human Rights Watch janë marrë nga pala serbe. Kjo është pranuar nga Frederic Abrahams nga Human Rights Watch në seancën gjygjësore ndaj Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara të Kosovës në Hagë.
Avokati i Thaçit, dhe avokati i Veselit, Ben Emmerson, kanë kundërshtuar konstatimet e Abrahams, duke i kërkuar të pranojë se ka gabuar në raportin e tij.
Ata theksuan se këto konstatime janë bërë mbi baza të burimeve serbe, të cilat nuk janë hetuar dhe konfirmuar nga organizata e Abrahams.
– Advertisement –
Avokati Emmerson e ka pyetur Abrahams nëse i ka marrë këto pretendime për vrasjen e civilëve nga UÇK-ja nga pala serbe.
“Po”, ka qenë përgjigja e tij.
Avokati Emmerson pas përgjigjes së tij, i ka thënë Abrahamas se “ajo çfarë keni bërë ju nuk është asgjë tjetër përveçse ricikluat propagandën serbe, apo jo?”.
“Duhet të ishte shkruar ndryshe”, ka thënë Abrahamas.
Avokati Emmerson ka kërkuar që dëshmitari të pranojë se ka gabuar në raportin e tij duke i vënë në pikëpyetje burimet serbe që ai i ka përdorur.
Emmerson: “Kur po flisni për vrasjen e shtatorit të 1998-ës, a e kuptuat se në atë aktakuzë nuk është vrarë askush?”
Abrahams: “Është formuluar keq”.
Emmerson ka theksuar se i vetmi vlerësim i saktë “është se janë gjetur trupa të pajetë në Gllogjan në fund të 1998-së”.
Abrahams është përgjigjur duke thënë se formulimi i tij mund të jetë i gabuar, duke shtuar se “duhej të kisha shkruar ‘vrasjet e pretenduara’”.
Avokati Emmerson i ka thënë se nuk është vetëm e formuluar keq, por tërësisht e gabuar, duke shtuar se “përfshirë 9 viktima të vrasjes së serbëve janë përjashtuar nga aktakuza”.
Gjithashtu, Emmerson ka pyetur Abrahamas: “Ju nuk keni bërë hetime sa i përket pretendimeve të autoriteteve serbe?”.
Abrahams: “S’kemi bërë hetime në tërësi… Ne asnjëherë nuk e kemi prezantuar rastin e Gllogjanit në Liqenin e Radoniqit.”
Avokati Emmerson tutje ka pyetur Abrahams nëse ata kanë shkuar në vendngjarjen e pretenduar të vrasjes së civilëve nga UÇK-ja në shtator të vitit 1998.
Abrahams është përgjigjur duke treguar se ata janë përpjekur të shkojnë në Liqenin e Radoniqit, por janë penguar.
Çfarë thuhet në raportin e HRW për atë periudhë?
Në një raport të titulluar “Shkeljet e së Drejtës Humanitare në Kosovë”, organizata ndërkombëtare e të drejtave të njeriut shkruan për “shkeljet e rregullave të luftës” dhe “abuzimet nga UÇK-ja”.
“Përkundër detyrimeve”, HRË konstaton që në krye se “UÇK-ja ka kryer shkelje të së drejtës ndërkombëtare humanitare, duke përfshirë marrjen e pengjeve”.
Në disa raste, në raport jepet gjykimi për UÇK-në. Për shembull, për rastin e Kleçkës, thuhet se ishte “abuzimi më i rëndë i UÇK-së”. Pak më tutje, në të njëjtin paragraf, theksohet gjithsesi rëndësia e një “hetimi të paanshëm”.
“Më 9 shtator, policia njoftoi se kishte gjetur një numër të trupave të personave të vrarë nga UÇK-ja afër Gllogjanit. Deri më 16 shtator, autoritetet kishin mbledhur tridhjetë e katër trupa, njëmbëdhjetë prej të cilëve u identifikuan, duke përfshirë disa shqiptarë etnikë. Para kësaj, abuzimi më i rëndë i UÇK-së përfshinte ekzekutimin e raportuar të njëzet e dy civilëve serbë në fshatin Kleçkë, ku policia pretendoi se kishte zbuluar mbetje njerëzore dhe një furrë të përdorur për djegien e trupave. Mënyra në të cilën u ngritën akuzat, megjithatë, ngre pyetje serioze dhe nënvizon rëndësinë e një hetimi nga një ekip i paanshëm hetimor mjeko-ligjor, i cili duhet të ekzaminojë Kleçkën, si dhe zonat e tjera ku janë raportuar ekzekutime”, thuhet në raport.
“Kryengritja shqiptare, e njohur si Ushtria Çlirimtare e Kosovës (KLA, në shqip, UÇK), gjithashtu ka shkelur ligjet e luftës me veprime të tilla si marrja e pengjeve civile dhe me ekzekutime”, thuhet ndër tjerash në raport.
“Human Rights Watch” gjithashtu thotë në atë raport se “UÇK-ja gjithashtu ka bërë shkelje të rënda të së drejtës humanitare ndërkombëtare, duke përfshirë marrjen e pengjeve dhe ekzekutimet pa gjyq”./Euronews Albania
