Trajneri i Akil Gjakovës, Driton Kuka, e ka vlerësuar si të çmendur paraqitjet e kosovarit në kategorinë e peshave deri në 73 kilogramë në Grand Prixin e Budapestit në Hungari, ku e fitoi medaljen e artë.
Sot, Akil Gjakova u shpall kampion në kategorinë e peshave deri në 73 kilogramë në Grand Prixin e Budapestit në Hungari, duke e shtuar edhe një medalje të artë në listën e sukseseve të tij, raporton Gazeta Express.
Në finale, Akil Gjakova u tregua shumë i fuqishëm për xhudistin rus Georgii Elbakiev, të cilën e mposhti për t’ia siguruar Kosovës medaljen e parë të artë në këtë garë, raporton Gazeta Express
Kosovari kishte treguar formë të mirë gjatë gjithë rrugëtimit deri në finale. Ai e kaloi rrethin e parë pa luftë, ndërsa në rrethin e dytë e mposhti xhudistin kanadez, Constatin Gabun me Ippon, para se të triumfonte në rrethin e tretë kundër zviceranit Nil Stump.
Akili tregoi se dëshiron medalje, kur në çerekfinale e mundi xhudistin japonez, Masashi Ebinuma, para se ta sigurojë atë në gjysmëfinale, duke e mundur garuesin nga Uzbekistani, Khikmatillokh Turaev, falë tri gabimeve të tij.
“Prapë e arta vjen në Kosovë. Akil Gjakova Dominon në Grand Prix Budapest! Çfarë Akili sot i çmendur!”, shkroi Kuka në llogarinë e tij në rrjetin social Facebook, pas suksesit së xhudistit kosovar, i cili bëri që flamuri i Kosovës të ngrihet mbi atë rus.
“Luftë pas lufte deri në finale mposhti Kanadezin,Zviceranin e në Çerekfinale Legjendën e xhudos Japonezin Ebinumen,në Gjysëmfinale Uzbekun e në finale Qershia mbi tortë Rusin Elbakiev në mënyrë efikase me dy hudhje të bukura!”.
Kjo është medalja e gjashtë për 23-vjeçarin në Turneun Botëror të IJF, ku përfshihen tituj të Masters, Grand Slams e Grand Prix. Ai më herët e kishte fituar të artën në Paris dhe në Zagreb, të dyja në vitin 2018. Ndërsa, tri medalje të argjendta i kishte fituar në Hagë, Abu Dhabi dhe Tunis, po ashtu të gjitha në vitin 2018.
Në këtë garë, Kosovën e përfaqësuan dje edhe tri xhudiste – Majlinda Kelmendi, Nora Gjakova dhe Distria Krasniqi. Këto dy të fundit ia fituan Kosovës nga një medalje të argjendtë, ndërsa Majlinda e mbylli garën pa medalje.
Suksesin e Akil Gjakovës do të tentojë ta përsërisë nesër edhe Loriana Kuka, e cila garon në kategorinë deri në 78 kilogramë.
