Ekspertët dhe opinionistët kanë thënë se ata kundërshtojnë marrëveshjen Danimarkë-Kosovë, sipas së cilës Danimarka do të marrë me qira 300 qeli burgu për të akomoduar të burgosurit jo-danezë, të cilët do të dërgohen në burgun e Gjilanit me një kosto prej 210 milionë euro gjatë periudhës së ardhshme prej dhjetë vitesh.
“Ne jemi shumë kundër kësaj marrëveshjeje sepse sistemi ynë i burgjeve nuk mund të përballojë të burgosurit që dërgohen këtu. Për Danimarkën është e lehtë të gjesh 300 të burgosur që nuk i dëshiron dhe t’i dërgosh në një vend tjetër”, tha Behxhet Shala, drejtor ekzekutiv i Këshillit të OJQ-ve për Mbrojtjen e të Drejtave dhe Lirive të Njeriut.
Sipas Shalës, dërgimi i të burgosurve në vende të tjera është i papranueshëm sepse sipas ligjit ndërkombëtar, të burgosurit kanë të drejtë t’i vuajnë dënimet me burg sa më afër familjeve të tyre.
Fatmire Haliti, eksperte për burgjet e Kosovës nga Qendra Kosovare për Rehabilitimin e Viktimave të Torturës, theksoi kushtet e këqija në burgje.
“Ne dimë për një numër të madh të lëndimeve të vetë-shkaktuara. Në burg ka përleshje, ka edhe vdekje. Deri vonë, kushtet në burgjet e Kosovës në përgjithësi nuk i plotësonin standardet ndërkombëtare apo evropiane, dhe në pesë vitet e fundit janë ndërtuar vetëm tre burgje të reja”, tha Haliti.
Ministri i Drejtësisë së Danimarkës, Nick Haekkerup, iu përgjigj kritikave, duke thënë se Kosova do të bëjë me të burgosurit e saj atë që e sheh të arsyeshme dhe se marrëveshja daneze me vendin vlen vetëm për qiranë e këtij burgu specifik.
Megjithatë, personat e dënuar për terrorizëm, kriminelët e luftës dhe njerëzit që janë të sëmurë apo që kanë nevojë për trajtim për shkak të çrregullimeve mendore nuk do të transferohen në burg.
Të paraburgosurit e parë pritet të transferohen në institucionin e paraburgimit në Gjilan në fillim të vitit 2023. /euroactiv
