Ka përfunduar protesta kundër ndërtimit të Xhamisë së Madhe në Prishtinë, e cila ishte organizuar nga ish-komandanti i Ushtrisë Çlirimtare të Kosovës, Binak Gashi.
Në protestë ka pasur mospajtime mes dy grupeve të protestuesve, një pjesë e protestuesve kanë kundërshtuar ndërtimin e kësaj xhamie ndërkaq një pjesë tjetër e qytetarëve kanë thënë se xhamia duhet të ndërtohet, transmeton Telegrafi.
Një prej tyre ka veshur uniformën e UÇK-së, derisa tha se është e pakuptueshme që një ish-ushtar i UÇK-së thërret protestë kundër ndërtimit të xhamisë.
“Është e pakuptueshme që një komandant del kundër xhamisë, ai po bashkohet me serbët. Është e drejtë e secilit me e pasë xhaminë. Mas 20 vitesh një person me thirrë një protestë të tillë është e pakuptueshme, ne luftën e kemi ba për me i mbrojtë vlerat tona, e njëra prej tyre është edhe feja”, tha Blerim Ejupi.
Protesta kishte filluar rreth orës 11:00, ndërsa protestuesit ishin të pajisur me maska mbrojtëse ndaj COVID-19.
Gjatë kohës sa u zhvillua protesta, një numër i konsiderueshëm i policëve kanë qëndruar në hyrje të vendit ku tashmë kanë filluar punimet për xhaminë.
Ndryshe, para disa ditësh, kryetari i Bashkësisë Islame të Kosovës, Naim Tërnava ka thënë se për një kohë të shkurtër do të përfundojë ndërtimi i xhamisë.
Projekti parashihet të kushtojë mbi 30 milionë euro dhe është i financuar nga Bashkësia Islame e Turqisë.
Ndërtimi i xhamisë parashihet të zgjasë rreth tri vite nga koha e fillimit të realizimit të projektit.
