Presidentja e Kosovës, Vjosa Osmani ka reaguar për ngjarjen e rëndë që ka ndodhur sot në Qendrën për Punë Sociale në Ferizaj, ku mbeti e vrarë një grua 21 vjeçare, pasi dyshohet se në drejtim të saj ka shtënë ish-bashkëshorti i viktimës.
Osmani ka kërkuar dënim maksimal për dorasin, teksa ka shtuar se këto ngjarje mund të ndalen vetëm të bashkuar si shoqëri kundër këtij fenomeni.
“Sërish femicid! Edhe një përkujtim se këta vrasës mizor të cilët ia kanë mësyer të shkatërrojnë jo veç jetën e grave, por edhe thelbin e shoqërisë sonë mund të ndalen vetëm nëse të gjithë bashkohemi e rizgjohemi si shoqëri kundër këtij fenomeni të tmerrshëm”, ka shkruar Osmani në Facebook.
Gjithashtu në këtë ngjarje u plagos 15-vjeçari D.C. ,vëllai i viktimës.
Reagimi i plotë:
Edhe një burrë që vranë një grua!
Sërish femicid!
Edhe një përkujtim se këta vrasës mizor të cilët ia kanë mësyer të shkatërrojnë jo veç jetën e grave, por edhe thelbin e shoqërisë sonë mund të ndalen vetëm nëse të gjithë bashkohemi e rizgjohemi si shoqëri kundër këtij fenomeni të tmerrshëm.
Mjaft më me dënime qesharake. Mjaft më me sistem të çalë të drejtësisë. Mjaft më me dështim të shtyllave që do të duhej të mbronin gratë tona, qytetarët tanë.
Ngushëllime të sinqerta familjes!
Dënim maksimal për vrasësin!
