Lëvizja Vetëvendosje ka adresuar kritika ndaj qeverisë Hoti për menaxhimin e situatës me pandeminë Covid 19.
Sipas kësaj partie opozitare, virusi korona i ka dalë nga kontrolli qeverisë, siç po e quajnë ilegale.
Përmes një konference për medie, deputetja Fitore Pacolli tha se insistimi i qeverisë për gjendje të jashtëzakonshme nuk është zgjidhje.
“Ajo që duhet të kuptoj qeveria ilegale sot se pandemia do të qëndroj për një kohë të gjatë. Shpallja e gjendjes së jashtëzakonshme nuk është zgjidhje, siç po ka dëshirë qeveria Hoti. Duhen politika të reja kreativitet për tu përshtatur në realitetin e ri, se si udhëtojmë, socializohemi, punojmë, duhet qasje e re dhe sjellje e re, ky normalitet i ri kërkon përgatitje, dhe mbi të gjitha kërkon qeveri të përgjegjshme që ofrojnë siguri dhe mbështetje te qytetarët”, tha Pacolli.
Sipas saj mungesa e një qeverie të përgjegjshme pa hedhur përgjegjësi mbi të tjerët, ka rritur pasigurinë në mesin e qytetarëve dhe po dëmton solidaritetin shoqëror.
“Sot një pjesë e madhe e qytetarëve të zhytur në kredi e borxhe ndihen të pasigurt. Gratë dhe familje me të ardhura të ulëta janë ndikuar më së shumti. Mungesa e përkrahjes së bizneseve që të mbahen në këmbë e që ka rrezikuar mirëqenien e tyre dhe arsyetimi i lehtë se ishin të moshuar dhe kishin sëmundje përcjellje, na obligon dhe detyron të kujdesemi më shumë për të moshuarit”, theksoi Pacolli.
Ndërkaq, deputeti tjetër i LVV-së, Artan Abrashi tha se qeveria Hoti nuk ka vizion për menaxhimin e pandemisë Covid-19.
