Deputeti i Lëvizjes Vetëvendosje Shpejtim Bulliqi në një prononcim ka folur mbi zhvillimet e fundit rreth marrëveshjes për bashkëqeverisje , VV-LDK.
Bulliqi ka deklaruar se duhet të gjendet një mundësi tjetër brenda kabinetit qeveritar që të zgjidhet çështja e postit të Kryeparlamentarit.
Ai thekson se nuk është e shëndetshme për institucionin e Kuvendit mënyra se se LDK-ja po e kërkon këtë post.
“Qëndrimet tona tashmë janë të njohura, çështja e zgjedhjes së kryeparlamentarit ka qenë një proces demokratik edhe i rregullt, prandaj ne nuk shohim asnjë arsye që të kthehemi në pikën zero për faktin se ne jemi dëshmitarë të asaj se sa me vështirësi po krijohen institucionet e vendit.
Prandaj Lëvizja Vetëvendosje po bën përpjekje maksimale që kjo marrëveshje të arrihet dhe unë mendoj shumë që ka hapësirë të mjaftueshme përbrenda kabinetit qeveritar me u kompensu posti i Kryeparlamentarit.
Nuk është shumë e shëndetshme edhe për institucionin e Kuvendit forma dhe mendësia se si Lidhja Demokratike e Kosovës po e kërkon Kryeparlamentarin dhe për një periudhë të shkurtër kohore pra 1 vjeçare ta rikthejë sërish këtë post” tha Bulliqi për Gazeta Blic
Gjatë pasdites së sotme LDK dhe LVV do të mbajnë takimin e radhës me prezencën e ambasadorëve të QUINT-it dhe ambasadores e BE-së në Kosovë Natalia Apostolova.
Ndërsa nga LDK-ja vazhdimisht janë shprehur se posti i kryeparlamentarit duhet tu takojë atyre në mënyrë që të arrihet marrëveshja.
