Kryesia e BIK-ut ka reaguar në lidhje me deklaratën e myftiut të Beogradit

0
194

Para disa dite myftiu i Beogradit, Mustafa Jusufspahiq, pat thënë: “Nuk na pëlqen që vendi ynë të ndahet, dhe nuk është e drejtë të ndahet djepi i Serbisë (Kosova)”

Në një komunikatë për media zyrtarë të BIK-ut kanë vlersuar se një veprim i tillë është treguesi më i mirë për politizimin e fesë për interesa të ulëta e meskine të një njeriu është në shërbim të politikës serbe.

Më poshtë gjeni regimin e plotë të BIK-ut:

I bëjmë me dije të ashtuquajturit Myfti të Beogradit se Kosova kurrë s’ka qenë pjesë e Serbisë e aq më pak djep i Serbisë. Ç’është e drejta, Kosova një kohë jo të shkurtë ka qenë e okupuar nga Serbia, por populli dhe paria e Kosovës kurrë nuk u pajtuan me okupimin serb dhe në vazhdimësi janë angazhuar për lirinë dhe pavarësinë e vendit.

Po ashtu i themi të ashtuquajtur Myfti të Beogradit, të bashkërenditurve me të dhe mentorëve të tij se Kosova tash e 19 vjet është e lirë, ndërsa tash e një dekadë shtet i pavarur e demokratik, i pranuar ndërkombëtarisht nga mbi 116 vende, andaj angazhimi juaj për të “ruajtur” Kosovën në kuadër të Serbisë i përket së kaluarës, të cilën ne tashmë e kemi lënë prapa.

“Myftiu” i Beogradit edhe mund t’ia bëjë ndonjë argat politikës zyrtare serbe siç edhe e thotë në rastin e Gambias, por një duhet ta kuptojë njëherë e përgjithmonë se pavarësia dhe shtetësia e Kosovës janë arritje që nuk bëjnë kurrë prapakthim.

Po ashtu i bëjmë me dije se Kosova ka institucionet e saj fetare, të organizuara në kuadër të Bashkësisë Islame te Kosovës e që kujdesen për besimtarët e saj, andaj Spahiqi s’ka pse të brengoset asgjë për myslimanët e Kosovës.

Deklaratat e Spahiqit nuk janë qëndrime të besimtarëve të Sanxhakut e assesi të Kosovës Lindore (Luginës së Preshevës), madje jemi të bindur që nuk janë as qëndrime të atyre myslimanëve që jetojnë në Beograd.

“Myftiu” Jusufspasiq është myfti i politikës zyrtare serbe dhe paraqet vetëm qëndrimet e mentorëve të tij e assesi të besimtarëve myslimanë.”